İdman
Seul Milli Elm və Texnologiya Universitetinin (SeoulTech) alimləri müəyyən ediblər ki, YouTube-da idman videolarına baxmaq insanların real həyatda fiziki aktivliyini artırmır.
“Performance Enhancement & Health” jurnalında dərc olunan araşdırma göstərib ki, bu cür məzmunu mütəmadi izləyən tələbələr sonradan real həyatda daha çox idmanla məşğul olmağa başlamırlar.
Tədqiqat çərçivəsində professor Yonho Kim və həmkarı Do Cin An 20–29 yaş aralığında, YouTube-da idman məzmununa baxmaq təcrübəsi olan tələbələri sorğuya cəlb ediblər.
İştirakçılar idman videolarına baxmaq motivasiyalarını 5 ballıq şkala üzrə qiymətləndiriblər. Bundan başqa, onlar həftə ərzində bir məşq zamanı ən azı 15 dəqiqə davam edən intensiv, orta və ya yüngül fiziki fəaliyyətlə nə qədər tez-tez məşğul olduqlarını bildiriblər.
Nəticələr göstərib ki, idman videolarına baxmağa motivasiyası daha yüksək olan tələbələr gələcəkdə də bu məzmundan istifadə etmək niyyətində olurlar.
Lakin nə yüksək motivasiya, nə də texnologiyalara müsbət münasibət real fiziki aktivliyin artmasına səbəb olub.
Tədqiqatın müəllifi professor Yonho Kim bildirib ki, YouTube-da idman məzmunundan istifadə motivasiyası və texnologiyanın qəbul edilməsi insanların videolarla daha çox maraqlanmaq niyyətini artırır. Lakin bu amillər birbaşa real idman fəaliyyətinə çevrilmir.
Alimin fikrincə, vəziyyəti dəyişmək üçün rəqəmsal məzmunu praktiki funksiyalarla zənginləşdirmək lazımdır. Buraya aydın məşq planları, yaxınlıqdakı idman obyektlərinə keçidlər və sosial dəstək imkanları daxil ola bilər.
Bu cür yanaşmanın insanlara passiv izləmədən real fəaliyyətə keçməyə kömək edə biləcəyi bildirilir.
İdman videoları niyə bizi ekranda saxlayır?
YouTube artıq fitnes və digər idman növləri üzrə təlim videolarının, eləcə də idman qidalanması ilə bağlı məsləhətlərin əsas platformalarından birinə çevrilib.
Gənclər belə videolara bəzən əyləncə, sosial ünsiyyət və ya idmanla bağlı emosiyaları dolayı yolla yaşamaq üçün baxırlar.
Lakin araşdırma göstərir ki, rəqəmsal mühit insanın idmanla məşğul olduğu hissini yaratsa da, bu, həmişə real fiziki fəaliyyətə çevrilmir.
Başqa sözlə, idman videosuna baxmaq məşq etmək demək deyil. Ekrandakı aktivliklə real həyatda fiziki hərəkət arasında əlavə motivasiya və praktiki mexanizmlər tələb oluna bilər.
N.Talıblı
