Müntəzəm fiziki aktivliyin olmaması təkcə artıq çəkiyə deyil, orqanizmdə bir çox gizli problemlərin yaranmasına səbəb olur. Həkimlər bildirirlər ki, hərəkətsiz həyat tərzi dünyada vaxtından əvvəl ölüm riskini artıran əsas amillərdən biridir. AzPost RBC-Ukrayna-ya istinadla xəbər verir ki, idmandan uzaq qalmaq həm fiziki, həm də psixoloji sağlamlığa ciddi təsir göstərir.
Mütəxəssislərin sözlərinə görə, fiziki aktivliyin azalması ilk növbədə çəkinin artmasına gətirib çıxarır. Gün ərzində qəbul edilən kalori yandırılandan çox olduqda artıq çəki qaçılmaz olur. Həftədə ən azı 150 dəqiqə orta intensivlikdə hərəkət və balanslı qidalanma çəkiyə nəzarətdə mühüm rol oynayır.
İdmanla məşğul olmayan insanlarda əzələlər tədricən zəifləyir və həcmini itirir. Oturaq iş rejimi olan şəxslər bu problemlə daha tez üzləşirlər. Qeyd olunur ki, 30 yaşdan sonra insanlar hər 10 ildə əzələ kütləsinin 3–5 faizini itirir və bu prosesi yavaşlatmaq üçün gücləndirici hərəkətlər vacibdir.
Fiziki aktivliyin azlığı sümüklərin möhkəmliyinə də mənfi təsir edir. Hərəkətsizlik sümük sıxlığının azalmasına səbəb olur və zamanla sınıq riskini artırır. Gəzinti, pilləkənlə qalxma və yüngül qaçış kimi yüklənməli hərəkətlər sümüklərin güclənməsinə kömək edir.
Mütəxəssislər həmçinin bildirirlər ki, idman etməyən insanlarda stress səviyyəsi daha yüksək olur. Fiziki aktivlik zamanı beyində xoş əhval yaradan maddələr ifraz olunur və stress hormonu olan kortizol azalır. Bu da depressiya və narahatlıq əlamətlərinin zəifləməsinə kömək edir.
Hərəkətsiz həyat tərzi enerjinin azalmasına və yuxu problemlərinə də yol açır. Daimi idman ürək və ağciyərlərin fəaliyyətini gücləndirir, gündəlik işlər üçün daha çox enerji verir. Eyni zamanda, düzgün vaxtda edilən fiziki aktivlik yuxuya getməyi asanlaşdırır və yuxunun keyfiyyətini artırır.
Araşdırmalara görə, idmandan uzaq qalan insanlarda xroniki xəstəliklərin riski daha yüksəkdir. Bunlara ikinci tip şəkərli diabet, maddələr mübadiləsi pozuntuları, ürək-damar xəstəlikləri, insult, yüksək təzyiq və xolesterinin artması daxildir. Mütəxəssislər sağlam həyat üçün müntəzəm fiziki aktivliyin vacibliyini bir daha vurğulayırlar.
