Təxminən 500 il əvvəl vəfat edən italiyalı rəssam, qrafik və memar Rafael Santinin ölüm səbəblərinin yeni versiyası müzakirə edilir.
Rg.ru xəbər verir ki, alimlərin fikrincə, dünyadakı bir çox şah əsərin müəllifi tibbi səhlənkarlığın qurbanı olub.
Əvvəllər onun sifilis səbəbiylə 37 yaşında öldüyü güman edilirdi, sonradan isə malyariya və ya tif xəstəliyinə tutulduğuna dair məlumatlar olub. Milan-Bikokka Universitetinin tarixçiləri bu fərziyyələri apardıqları araşdırmalara əsaslanaraq qəbul etmirlər.
İntibah dövrünün dahisinin ölümünün əsl səbəblərini öyrənmək üçün alimlər Rafaelin müasirləri Corcio Vasarinin “Ən məşhur rəssamların, heykəltəraşların və memarların həyatları” məlumatlarını, Ferrara hersoqu Alfonso Paoluçi və 19-cu əsrin incəsənət tarixçisi Cüzeppe Kamporinin sənədlərini araşdırıblar.
Tədqiqatçılar Rafaelin sətəlcəm xəstəliyinə tutulduğu qənaətinə gəliblər. Onun orqanizmi zəifləyib, amma həkimlər xəstənin sağlamlığını o dövrdə bilinən dərmanlarla gücləndirmək əvəzinə, ölümünü sürətləndirən qan çıxarma proseduruna müraciət etmək qərarına gəliblər. Onlar qeyd edir ki, qan çıxarma bağırsaq infeksiyası və ya digər xəstəliklərə kömək edə bilər, ancaq iltihablanma halında onun istifadəsi yolverilməzdir.
“Rafaelin hazırkı COVID-19 kimi bakterial və ya virus mənşəli sətəlcəmə yoluxduğunu dəqiq deyə bilmərik. Ancaq müasirlərinin təsvirinə görə, bu, mümkündür”, – deyə tibb tarixçisi Mikele Auqusto Riva qeyd edib.
