İslam İnqilabı Keşikçiləri Korpusu (SEPAH) ABŞ Hərbi Dəniz Qüvvələrinin Dəniz Daşıma Komandanlığının döyüş gəmisini vurduğunu açıqlayıb.
Azpost.info bildirir ki, bu barədə SEPAH-ın bəyanatında deyilir.
SEPAH İran dəniz bölməsi tərəfindən həyata keçirilən raket hücumunda gəminin ciddi şəkildə zədələndiyini iddia edir.
Bəyanatda həmçinin vurğulanır ki, bölgədəki digər ABŞ Hərbi Dəniz Qüvvələrinin hədəfləri İran raketləri və dronlarının hədəfində qalır.
Məlumatın yayıldığı vaxtdan ABŞ-dan heç bir rəsmi şərh verilməyib. Zərərin xarakteri və heyət üzvlərinin vəziyyəti barədə məlumatlar dəqiqləşdirilir.
İranın xarici işlər naziri Abbas Əraqçi NBC-yə verdiyi müsahibədə Ali Rəhbər Əli Xameneinin sağ olduğunu bildirib.
“Bildiyim qədəri ilə o, sağdır”, – Əraqçi son hücumların mümkün nəticələri barədə xəbərləri şərh edərkən canlı yayımda deyib.
İranın xarici işlər naziri zərbələrdə iki komandirin ölümünü təsdiqləyib, lakin İranın yüksək vəzifəli rəsmilərinin sağ qaldığını vurğulayıb.
Reuters agentliyi vəziyyətlə tanış olan üç mənbəyə istinadən İslam İnqilabı Keşikçiləri Korpusunun komandiri general Məhəmməd Pakpur və İranın müdafiə naziri Əmir Nəsirzadənin bu səhər İsrailin İran ərazisinə endirdiyi zərbələr nəticəsində həlak olduğunu bildirir.
Agentliyin mənbələrinə görə, hər iki yüksək vəzifəli İran rəsmisi hədəfə alınan hücumlarda həlak olub. Onların ölümünün yeri və şəraiti barədə ətraflı məlumat verilməyib.
İran hakimiyyəti tərəfindən bu məlumatın rəsmi təsdiqi olmayıb.
