İranın İslam İnqilabı Keşikçiləri Korpusu (SEPAH) ABŞ-a məxsus hərbi təyyarələrə qarşı ballistik raketlərlə zərbə endirdiyini bəyan edib.
Azpost.info bildirir ki, bu barədə İranın Press TV telekanalı məlumat yayıb.
Məlumata görə, SEPAH İordaniyanın cənubundakı Əqəbə hava limanında yerləşən ABŞ Silahlı Qüvvələrinə məxsus C-17 və P-8 hərbi təyyarələrini ballistik raketlərlə hədəfə aldığını açıqlayıb.
Bundan başqa, İran hərbçiləri ölkənin qərb bölgələrində ABŞ-a məxsus MQ-9 pilotsuz uçuş aparatını vurduqlarını da iddia ediblər.
ABŞ İrana qarşı zərbələri davam etdirir
Xatırladaq ki, ABŞ Silahlı Qüvvələrinin Mərkəzi Komandanlığı (CENTCOM) iyulun 19-da İrana qarşı doqquzuncu zərbə dalğasının başa çatdığını bildirmişdi.
Məlumata əsasən, ABŞ qüvvələri İranın hərbi komanda məntəqələrinə, hava hücumundan müdafiə sistemlərinə, sahil müşahidə obyektlərinə, dəniz infrastrukturlarına, raket və pilotsuz uçuş aparatlarının buraxılış meydançalarına, həmçinin rabitə şəbəkələrinə zərbələr endirib.
Qeyd edək ki, İranın ABŞ hərbi təyyarələrini vurması və MQ-9 pilotsuz aparatını məhv etməsi ilə bağlı məlumat hələlik müstəqil mənbələr tərəfindən təsdiqlənməyib. ABŞ tərəfi də bu iddialarla bağlı rəsmi açıqlama verməyib.
