İran vasitəçiliklə əldə edilən atəşkəs təşəbbüslərini rədd edib və ABŞ ilə danışıqlar üçün öz şərtlərini irəli sürüb.
Azpost.info bildirir ki, bu barədə Livanın “Əl Mayadeen” televiziya kanalı mənbələrə istinadən məlumat yayıb.
“İran bütün vasitəçiliklə əldə edilən atəşkəs təşəbbüslərini rədd edir, çünki şərtləri var və real zəmanətlər istəyir”-deyə xəbərdə vurğulanır.
Kanalın məlumatına görə, İran rəhbərliyi vasitəçilərin hazırkı təkliflərini rədd edir, onları qeyri-kafi hesab edir və daha aydın öhdəliklər tələb edir.
Xüsusilə, Tehran ABŞ-dan gələcəkdə təcavüzkarlığa qarşı zəmanət, kompensasiya ödənişləri və İranın nüvə enerjisi obyektlərində tam nüvə yanacaq dövrü tətbiq edə biləcəyinə dair razılıq tələb edir.
10 martda İranın xarici işlər naziri Abbas Əraqçi bildirib ki, Tehran və Vaşinqton arasında danışıqların İranın yeni rəhbəri Müctəba Xameneyi dövründə nəzərdən keçirilməsi ehtimalı azdır.
Elə həmin gün xarici işlər nazirinin müavini Kazem Qərib Abadi Rusiya, Çin və Fransa da daxil olmaqla bir neçə ölkənin atəşkəslə bağlı ölkəyə müraciət etdiyini açıqlayıb. O, Tehranın atəşkəs üçün ilk şərtinin təcavüzün təkrarlanmayacağına dair zəmanət olduğunu vurğulayıb.
İran prezidenti Məsud Pezeşkian martın 9-da bildirib ki, qonşu ölkələrin əraziləri respublikaya hücum üçün istifadə edilməsə, Tehran gərginliyi azaltmağa hazırdır.
