İran İslam Respublikası Silahlı Qüvvələrinin Baş Qərargahı İbrahim Rəisinin helikopterinin qəzaya uğraması ilə bağlı ilkin hesabat dərc edib.
Azpost.info İRNA-ya istinadən bildirir ki, hesabatda qeyd edilib ki, helikopter qəzasından təxminən 90 saniyə əvvəl pilot onunla birlikdə uçan digər iki helikopterlə əlaqə saxlayıb. Prezident helikopteri təyin olunmuş marşrut üzrə hərəkət edib və ondan yayınmayıb. Dispetçerlərlə ekipaj arasında gedən söhbətlərdə şübhəli heç nə müşahidə olunmayıb.
Bildirilib ki, qəzaya uğrayan helikopterin qalan hissələrində güllə izi və ya buna bənzər hallar aşkar edilməyib.
Helikopter yüksəklikdən yerə çırpıldıqdan sonra alovlanıb.
Hesabatda əlavə edilib ki, ərazinin mürəkkəbliyi, duman və temperaturun aşağı olması səbəbindən kəşfiyyat əməliyyatı gecəyə qədər uzadılıb və gecəboyu davam etdirilib. Bazar ertəsi səhər tezdən İranın pilotsuz uçuş aparatlarının köməkliyi ilə qəzanın dəqiq yeri məlum olub.
“Helikopter qəzası ilə bağlı sənəd və sübutların əhəmiyyətli bir hissəsi toplanıb, bəzi hissələrin və sənədlərin araşdırılması üçün daha çox vaxt lazımdır”, – İran Silahlı Qüvvələrinin Baş Qərargahının hesabatında qeyd edilib.
