Peyk görüntülərinin təhlili göstərir ki, İran ən azı iki böyük raket obyektinin yaxınlığında genişmiqyaslı tikinti işləri aparır, həmçinin ABŞ və İsrailin aylarla davam edən hava zərbələri nəticəsində zədələnmiş hərbi bazalarını bərpa edir.
Noyabr ayında çəkilmiş peyk görüntülərində İranın paytaxtı Tehranın yaxınlığındakı Kərəc şəhərində yerləşən Garmdarə hərbi bazasında, eləcə də ölkənin şimalındakı Şahrud bazasında torpaq işlərinin izləri və yeni tikililər görünür.
Bu barədə görüntüləri araşdıran Britaniyanın MAIAR kəşfiyyat şirkətinin analitikləri BBC-nin BBC Verify məlumatların yoxlanılması bölməsinə bildiriblər.
Bərpa işlərinin əlamətləri daha azı 12 hərbi obyektdə də müşahidə olunur. Bunların arasında raket kompleksləri və aviabazalar da var.
İranın qərbində, İraq sərhədinin yaxınlığında yerləşən Kirmanşah raket bazasında dağıdılmış tikililərin yerində yeni dam örtükləri meydana çıxıb. Tehranın şərqindəki Pərçin hərbi kompleksinin ərazisində isə dağıntılar təmizlənib və zədələnmiş konstruksiyalar götürülüb. Bu obyekt əvvəllər də bir neçə hava zərbəsindən sonra dəfələrlə bərpa edilib.
İran üzrə ixtisaslaşmış, Mərkəzi Kəşfiyyat İdarəsinin (MKİ) keçmiş analitiki Cim Ləmsonun sözlərinə görə, Şahrud yaxınlığında aparılan torpaq işləri raket istehsalı ilə əlaqəli ola bilər.
O hesab edir ki, yaxınlıqdakı Şahrud aviabazası son illərdə dəfələrlə hücuma məruz qaldığından, İran İslam İnqilabı Keşikçiləri Korpusu (SEPAH) istehsal güclərini yeraltına köçürməyin yollarını axtarır.
