İran hakimiyyəti ölkə sakinlərinə elektrik enerjisinə qənaət etmək məqsədilə pik saatlarda imkan daxilində kondisionerlərdən istifadəni məhdudlaşdırmağa çağırıb. Rəsmi məlumata görə, bu addım ciddi yük altında çalışan enerji sisteminin fəaliyyətini sabit saxlamaq məqsədi daşıyır.
Azpost.info xəbər verir ki, bu barədə New York Post məlumat yayıb.
İranın Energetika Nazirliyi bildirib ki, tətbiq olunan məhdudiyyətlər ölkənin xüsusilə ekstremal istilərin müşahidə olunduğu cənub bölgələrinin fasiləsiz elektrik enerjisi ilə təmin edilməsinə kömək edəcək.
Nazirlik eyni zamanda enerji infrastrukturunun bir sıra obyektlərinin ciddi ziyan gördüyünü açıqlayıb. Lakin hansı obyektlərin zərər çəkdiyi barədə əlavə məlumat verilməyib.
ABŞ rəsmiləri bildiriblər ki, Amerika hərbçilərinin endirdiyi zərbələr yalnız hərbi hədəflərə yönəlib. Ağ Evin nümayəndəsi vurğulayıb ki, enerji obyektləri də daxil olmaqla mülki infrastruktur əməliyyatların hədəfi olmayıb. ABŞ Mərkəzi Komandanlığı isə enerji sisteminə zərbə endirilməsi ilə bağlı yayılan məlumatları şərh etməkdən imtina edib.
Vəziyyəti ölkədə hökm sürən güclü istilər daha da ağırlaşdırır. Tehranda havanın temperaturu 39 dərəcəyə yaxınlaşıb. Son hücumların baş verdiyi ərazilərdən biri olan Bəndər-Abbas şəhərində isə termometrlərin 41 dərəcəni göstərəcəyi proqnozlaşdırılır.
Hakimiyyət hesab edir ki, isti hava şəraitində kondisionerlərdən istifadənin müvəqqəti məhdudlaşdırılması elektrik şəbəkəsinə düşən yükü azaldacaq və mümkün enerji kəsintilərinin qarşısını almağa kömək edəcək.
