ABŞ-ın İranla müharibəsi daha təxminən altı ay davam edə bilər və Vaşinqtonun Yaxın Şərqdə növbəti uzunmüddətli müharibəsinə çevrilə bilər.
Bunu ABŞ-ın keçmiş müdafiə naziri Leon Panetta The Guardian qəzetinə müsahibəsində bildirib.
Onun sözlərinə görə, Vaşinqton və Tehran hazırda uzunmüddətli dalana dirənib və vəziyyətdən çıxış üçün aydın yol görünmür. Panetta xəbərdarlıq edib ki, münaqişə İraq və Əfqanıstan müharibələrinə bənzər növbəti “əbədi müharibə”yə çevrilə bilər.
“Düşünürəm ki, bu müharibənin heç bir həll olmadan daha altı ay davam etməsi ehtimalı yüksəkdir”, – deyə o bildirib.
Pentaqondakı vəziyyət də narahatlıq yaradır
Panetta Pentaqonun rəhbərliyindəki vəziyyəti də tənqid edib. Onun fikrincə, ABŞ hərbçiləri hərbi rəhbərlikdə ciddi sarsıntıların yaşandığı bir vaxtda döyüşlərdə iştirak edir. Bu isə ABŞ-ın rəqiblərində Vaşinqtonun zəif olduğu təəssüratını yarada bilər.
Münaqişə fonunda ABŞ Ordusunun naziri Den Driskollun gözlənilmədən istefa verməsi də Pentaqonda müzakirələrə səbəb olub. Pentaqon isə təşkilati xaosla bağlı ittihamları rədd edərək qurumun “tam gücü ilə” fəaliyyət göstərdiyini bildirib.
Trampın qarşısında üç seçim var
Panettanın fikrincə, Donald Trampın hazırda üç əsas variantı mövcuddur:
- müharibəni dayandıraraq qələbə elan etmək;
- mövcud qarşıdurmanı dövri zərbələrlə davam etdirmək;
- İran üzərində əsas təzyiq rıçağı hesab etdiyi Hörmüz boğazına nəzarəti ələ keçirməyə çalışmaq.
Keçmiş müdafiə naziri hesab edir ki, ABŞ yalnız əməliyyatın məqsədlərini əhəmiyyətli dərəcədə dəyişəcəyi halda hərbi qələbə qazana bilər. Onun fikrincə, Vaşinqton üçün əsas hədəf Hörmüz boğazının açılmasını təmin etmək olmalıdır.
Panetta həmçinin bildirib ki, bir çox amerikalı Trampın müharibəni effektiv şəkildə idarə etmək qabiliyyətinə olan inamını itirib.
O, ABŞ hərbçilərinin vəziyyətindən də narahatlığını ifadə edib. Panettanın sözlərinə görə, hərbçilərin ezamiyyət müddətləri rekord həddə çatıb və qoşunların rotasiyası lazımi səviyyədə planlaşdırılmır.
