“İrşad”
“İrşad” mağazalar şəbəkəsi müştəri şikayəti ilə gündəmə gəlib. AzPost xəbər verir ki, şirkətin Xırdalan filialından “Samsung” paltaryuyan maşın alan müştəri Röyalə Nəsirli İrşad mağazalar şəbəkəsi ilə bağlı ciddi narazılıq bildirib. Şikayətçi deyir ki, 18 sentyabr tarixində aldığı məhsulun barabanı dəyişdirilmiş olub və bu barədə əvvəlcədən məlumat verilməyib. Məhsulun problemli olduğu sonradan üzə çıxsa da, mağaza müştərinin ilkin ödənişi olan 300 AZN-i hələ də geri qaytarmayıb.
Röyalə Nəsirli sosial şəbəkədə yazıb ki, çoxsaylı zəng və şikayətlərinə baxmayaraq, məsələ həll edilməyib və nəticədə əsəb pozğunluğu yaşayıb. O, əlavə edib ki, belə hallar müştəri hüquqlarının kobud şəkildə pozulmasına misaldır.
Mağaza şəbəkəsi isə açıqlama verərək bildirilib ki, sözügedən model vitrində nümayiş olunan məhsul olub və detal dəyişikliyi barədə məlumat verilməyib. Şirkət əlavə edib ki, ödəmə prosesi artıq aparılıb və 10 iş günü ərzində kartlara ödənişin qaytarılması nəzərdə tutulur.
Müştəri isə vurğulayıb ki, “10 iş günü” müddəti həqiqətən aydın deyil, çünki bu müddət artıq yarıdan çox keçib və hələ də ödəniş kartına daxil olmayıb. Sosial şəbəkədə digər istifadəçilər də bu gecikmələrdən narazılıq ifadə edib və mağazanın müştəri xidmətinin keyfiyyətini tənqid ediblər.
Ekspertlər qeyd edirlər ki, qanunvericiliyə əsasən, istehlakçı ödəniş etmiş məhsulu qaytarmaq istədikdə və ya məhsulda qüsur aşkar edildikdə, satıcı istisnasız ödənişi dərhal geri qaytarmalıdır. Azərbaycan Respublikasının “İstehlakçı hüquqlarının qorunması haqqında” qanununda bu müddət 10 iş günü kimi nəzərdə tutulub, lakin praktiki təcrübədə gecikmələr və məsuliyyətsizlik hallarına rast gəlinir.
Müştərilər bildirirlər ki, mağazalar bəzən problemi həll etmək əvəzinə, müştərini blok edir, zəngləri cavabsız qoyur və sosial şəbəkələrdə tənqidlərə reaksiya vermir. Hüquqşünaslar isə vurğulayır ki, belə hallar həm istehlakçı hüquqlarının pozulması, həm də şirkətin reputasiyasına ciddi ziyan vurur.
Röyalə Nəsirli əlavə edib ki, məsələnin ilk gündən həlli həm mağaza, həm də müştəri üçün daha doğru olardı və əsəblərin pozulmasının qarşısı alınardı. Sosial şəbəkədə digər istifadəçilər də oxşar hallardan danışaraq, mağazalardan məhsul alarkən diqqətli olmağı tövsiyə edirlər.
