İstanbul prokurorluğu Somali prezidenti Həsən Şeyx Mahmudun oğluna cinayət işi açıb.
Azpost.info xəbər verir ki, ona qarşı cinayət işi qəsdən adam öldürmə maddəsi ilə başlanıb.
Bu maddə iki ildən altı ilədək müddətə azadlıqdan məhrumetmə cəzası nəzərdə tutur.
Türkiyənin ədliyyə naziri Yılmaz Tunç bildirib ki, Somali prezidentinin oğlu tezliklə məhkəmədə ifadə verəcək. Nazirin sözlərinə görə, məhkəmə-tibb ekspertlərindən yeni rəy daxil olub. Rəyə əsasən, qəzada əsas günah sürücünün üzərinə düşür.
Hadisə noyabrın 30-da İstanbulda Somali liderinin oğlunun idarə etdiyi avtomobilin motosikletli kuryeri vurması nəticəsində baş verib. Dekabrın 6-da kuryer aldığı xəsarətlərdən xəstəxanada ölüb. Sürücü protokol tərtib edildikdən sonra sərbəst buraxılıb və dekabrın 2-də Türkiyəni tərk edib.
Hüquq müdafiəçiləri bütün günahın kuryerin üzərinə atıldığı ilk qəza hesabatı ilə sonrakı hesabatlar arasında uyğunsuzluq aşkar ediblər. Nəticədə əlaqədar orqanlar hadisə ilə bağlı əlavə yoxlamalar və hesabatlar tələb ediblər.
Azpost.info
