Azərbaycanın sabiq maliyyə naziri Fikrət Yusifov uzun illərdən sonra ilk dəfə 1999-cu ildə vəzifədən nə üçün azad edilməsinin səbəbini açıqlayıb.
Azpost.info bildirir ki, bu sözləri sabiq maliyyə naziri Fikrət Yusifov LAF TV-yə müsahibəsində deyib.
“Mənim nazir vəzifəsindən getməyimin əsas səbəbi sabiq müdaifə naziri Səfər Əbiyevlə aramızda olan münaqişə oldu”-deyə o açıqlamasında bildirib.
Onun sözlərinə görə, toqquşmanın bir səbəbi olub : “Onlar vəsaitləri təyinatı üzrə xərcləmirdilər. Biznes layihələrində istifadə edirdilər. Qiymətləri şişirdirdilər. Yaranmış vəziyyəti mən ulu öndər Heydər Əliyevə məruzə etmişdim, faktları masa üzərinə qoymuşdum. Ondan əvvəlki nazir Məmmədərfi Məmmədovu da bu faktlara görə işdən çıxartdırmışdım”.
Sabiq nazirin sözlərinə görə, 1999-cu ildə Səfər Əbiyevi də həmin aqibət gözləyirdi: “Heydər Əliyevdən nazirilkidə büdcə vəsaitlərinin xərclənməsinin yoxlanılması ilə bağlı razılığı almışdım. Prezident mənə dedi ki, “vaxtını mən sənə deyəcəyəm”. Təəssüf ki, Heydər Əliyev həmin dövrdə xəstələndi. Ona görə məsələ ləngidi”.
F.Yusifov deyib ki, Müdafiə Nazirliyində hər kəs bilirdi ki, bu məsələ ilə bağlı onunla Səfər Əbiyev arasında qarşıdurma var: “Nazirlikdə nə qədər sağlam adam var idi bu işlərlərə bağlı mənə məruzə edirdilər. İlkin mənbələrədən biliridm ki, onlar orada nə oyun çıxarırlar.
“Bir dəfə Müdafiə Nazirliyi çox böyük alqı-satqı etmişdi. Böyük həcmdə ət alışı idi. Standartlara uyğun olmayan əti orduya yedizdirirdilər. cBiləcəridə ordunun təzhizatı ilə bağlı böyük baza var idi. Onun komandiri mənim yanıma gəldi. Vicdanlı adam idi. Dedi ki, “Fikrət müəllim, bazaya belə bir ət gətirilib. Mən o qədər vicdanımı itirməmişəm. Bu əti əsgərlərə yedirdəcəklər. Nəsə konservləşdirilmiş ət idi. Bilinmədi nə əti idi.
O zaman Prezident ABŞ-da müalicədə idi. Keçmiş Baş nazir Artur Rəsizadənin imzası ilə bir komissiya təyin etdik və göndərdik Biləcərdidəki bazaya yoxlamaya. Təsəvvür edin ki, Səfər Əbiyev əli avtomatlı adamlarla bir həftə o komissiyanı bazaya buraxmadı. Baş nazir bir az qətiyyət göstərmədi. Mən də bundan incidim. Ordudan gəlib deyirdilər ki, necə olur ki, bir anbarı yoxlaya bilmirsiniz?
Bir həftədən sonra anbarın qapılarını açdılar və bizi çağırdılar. Anbarda heç nə yox idi. Gecə ilə ətləri daşıyıb rayonlara, hərbi hissələrə aparmışdılar”.
F.Yusifov bundan sonra KİV-də böyük bir tənqidi yazı ilə çıxış edib: “O yazı ilə də vəzifədən getdim. Başlıq belə idi ki “Səfər Əbiyev ticarətlə məşğul olduğu qədər ordu quruculuğu ilə məşğul oslaydı Azərbaycan ordusu dünyanın ən güclü ordularından biri olardı”. Bu yazıdan sonra Təhlükəsizlik Şurasının iclasında 4 saat müzakirə olundu. Mən orada vəzifədən azad edildim. Emosiyalarımı saxlaya bilməmişdim. Maliyyə naziri olan adam müdafiə naziri ilə münaqişəsini qəzetə çıxarmamalı idi”.
“Mən dövlətin büdcəsini varlığımıla qoruyurdum”-deyə F.Yusifov sonda bildirib.
Azpost.info
