“Maarifçi Qadınlar” İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən “Türkiyənin İstanbul şəhərində yaşayan və müxtəlif səbəblərdən təhsildən kənarda qalan məktəbyaşlı uşaqların təhsilə cəlb edilməsi” layihəsi çərçivəsində iki maarifləndirici seminar keçirib.
Seminarlar 14 iyun 2026-cı il tarixində saat 11:00-da və 16:00-da İstanbulun müxtəlif bölgələrində yaşayan azərbaycanlıların iştirakı ilə təşkil olunub.
Tədbirlərin əsas məqsədi İstanbulun müxtəlif ərazilərində yaşayan və çalışan azərbaycanlıları məktəbyaşlı uşaqların təhsilə cəlb edilməsi məsələsi barədə məlumatlandırmaq, eləcə də təhsildən kənarda qalan uşaqların müəyyənləşdirilməsində və məktəbə yönləndirilməsində ictimai dəstəyi gücləndirmək olub.
Tədbirdə çıxış edən “Maarifçi Qadınlar” İctimai Birliyinin sədri və qurucusu Şərqiyyə Məmmədova bildirib ki, Ermənistan–Azərbaycan münaqişəsinin başladığı dövrdən etibarən Naxçıvanda yaranmış mürəkkəb sosial-iqtisadi vəziyyət, işsizlik və maddi çətinliklər səbəbindən bir sıra ailələr Türkiyəyə üz tutublar.
Onun sözlərinə görə, yaşayış icazəsi ilə bağlı hüquqi çətinliklər bəzi ailələrin övladlarını Türkiyədəki dövlət məktəblərinə yerləşdirməsinə mane olub. Bu vəziyyət uzun müddət, təxminən 2017-ci ilədək davam edib. Nəticədə, bəzi uşaqlar və gənclər davamlı təhsil imkanlarından məhrum olub, onların arasında oxu və yazı bacarıqlarını yetərincə mənimsəyə bilməyənlər də olub. Bu isə sonrakı illərdə həmin şəxslərin həm gündəlik həyatında, həm də cəmiyyətə uyğunlaşmasında ciddi çətinliklər yaradıb.
Şərqiyyə Məmmədova qeyd edib ki, ötən dövrdə İstanbul şəhərində “Təhsil, Mədəniyyət və Sosial Həmrəylik” sivil toplum təşkilatı, həmin təşkilatın nəzdində isə Hüseyn Cavidin adını daşıyan məktəb yaradılıb.
“Valideynlərinin müxtəlif ərazilərdə çalışması səbəbindən gün ərzində evdə nəzarətsiz qalan və ya İstanbul küçələrində müxtəlif zərərli təsirlərlə üzləşmək riski daşıyan 7 minə yaxın məktəbyaşlı azərbaycanlı uşağın təhsilə cəlb olunmasına dəstək göstərilib. Bununla da onların təhlükəsiz mühitdə təhsil almasına və gələcəyə daha inamla hazırlanmasına töhfə verilib”, – deyə təşkilat sədri bildirib.
Keçirilən seminarların hər birində 25–30 nəfər olmaqla, ümumilikdə 60-a yaxın şəxs iştirak edib.
Fotolar
