“Almaniya kansleri Olaf Şolts və Fransa lideri Emmanuel Makronun Rusiya prezidenti Vladimir Putinlə telefon danışıqlarını davam etdirməsini doğru saymıram”.
Azpost.info xəbər verir ki, bunu Polşa prezidenti Anjey Duda bildirib.
Duda deyib ki, Rusiyanın Ukraynaya hərbi təcavüzünün davam etdiyi bir vaxtda Putinlə təmasların qurulması onu heyrətləndirir. Üstəlik, bu danışıqlar heç bir nəticə də vermir.
Polşa liderinin sözlərinə görə, Rusiya qüvvələrinin Ukraynaya göndərilməsinə təkcə Putin cavabdehdir. Onunla danışıq aparmaq isə Rusiya ordusunun Ukraynada törətdiyi cinayətlərə görə məsuliyyət daşıyanlara bir növ legitimlik effekti verməkdir: “İkinci dünya müharibəsi zamanı kimsə Adolf Hitlerlə belə danışıb? Kimsə deyib ki, o, simasını qoruyub saxlamalıdır və ya Adolf Hitleri alçaltmayacaq şəkildə hərəkət etmək lazımdır. Mən belə siyasətçi tanımıram”.
Azpost.info
