Rusiya-Ukrayna müharibəsi
İyunun 10-u Rusiya ilə Ukrayna arasında gərginlik növbəti dəfə zirvəyə çatıb. AzPost xəbər verir ki, gecə saatlarında Ukraynanın paytaxtı Kiyev şəhərinə Rusiya ordusu tərəfindən çoxkombinasiyalı hava hücumları həyata keçirilib. Paytaxtın yeddi rayonu birbaşa hücuma məruz qalıb.
Gecə boyu şəhərdə güclü partlayış səsləri eşidilib və hava hücumundan müdafiə sistemləri aktivləşdirilib. Baş verən təhlükə səbəbindən paytaxt sakinləri gecəni yeraltı metro stansiyalarında keçirməyə məcbur olublar. Hücumlar nəticəsində paytaxtın müxtəlif bölgələrində yanğınlar və ciddi dağıntılar qeydə alınıb.
Ukrayna Hərbi Hava Qüvvələri isə bəyan edib ki, Kiyev, Çerniqov və Çerkassı vilayətlərində də PUA uçuşları qeydə alınıb. Kiyev meri Vitali Kliçko paytaxtın kütləvi şəkildə dron atəşinə tutulduğunu təsdiqləyib. Hazırda zərərçəkənlərlə bağlı məlumatlar dəqiqləşdirilir.
Digər tərəfdən, bu hücumların ardınca Rusiyanın özündə də təhlükəsizlik tədbirləri gücləndirilib. Moskvanın Domodedovo, Şeremetyevo, Vnukovo və Jukovski hava limanlarında PUA hücumu təhlükəsi səbəbilə “Xalça” rejimi tətbiq edilib. Hava limanları müəyyən müddət ərzində təyyarələrin enməsinə və uçmasına icazə verməyib.
Moskva vilayətinin Naro-Fominsk, Domodedovo, Ramenskoye, Odintsovo və Jukovski bölgələrində də partlayış səsləri eşidildiyi bildirilir. Jukovski və Naro-Fominsk sakinləri ən azı on yüksək səs dalğası eşitdiklərini bildiriblər.
Son məlumata görə, Moskvanın əsas hava limanlarında məhdudiyyətlər aradan qaldırılıb və təyyarələrin qəbulu, yola salınması bərpa olunub. Lakin Kaluqa və Tambov hava limanlarında hələ də təhlükəsizlik səbəbilə məhdudiyyətlər qüvvədə saxlanılır.
