Azərbaycanın Ukraynadakı səfirliyinə edilən hava zərbəsindən və ümumiyyətlə Rusiya ordusunun Kiyevə endirdiyi intensiv raket və PUA hücumlarından sonra Ukrayna paytaxtı və Kiyev vilayətində Azərbaycana aid heykəllərin baryerlər və qoruyucu çəpərlərlə mühafizəsi işlərinə başlanılıb.
Artıq səfirliyin qarşısındakı Ümummilli Lider Heydər Əliyevin heykəlinin qorunması istiqamətində tədbirlərə start verilib. Qarşıdakı günlərdə digər abidələrin də mühafizəsi üzrə işlər həyata keçiriləcək. Bu proses SOCAR-ın Ukraynadakı nümayəndəliyi tərəfindən icra olunur.
“SOCAR Ukraine”nin əməkdaşı Andrey Pomiluiko AZƏRTAC-a açıqlamasında bildirib ki, son vaxtlar Kiyevdə Rusiya tərəfindən raket və pilotsuz uçuş aparatları ilə həyata keçirilən hücumların artması abidələrin qorunmasını zəruri edib. “Kiyev şəhəri və Kiyev vilayətində Azərbaycan Respublikasına aid bir sıra abidələr mövcuddur. Bunlara Kiyevdəki Heydər Əliyev parkında yerləşən Heydər Əliyevin abidəsi və fəvvarəsi, İrpen şəhərinin Dostluq parkındakı Zərifə Əliyevanın abidəsi, eləcə də Kiyevdə Nəsimi, Səməd Vurğun və Müslüm Maqomayevin abidələri daxildir. Hazırda bütün bu abidələrin yanğına davamlı brezentlə örtülməsi, ətrafının qum kisələri ilə möhkəmləndirilməsi və üzərinə taxta karkas quraşdırılması işləri aparılır. Abidələrin fasad hissəsində isə onların konturunu əks etdirən banerlər yerləşdiriləcək”,- deyə Andrey Pomiluiko əlavə edib.
Azərbaycana məxsus abidələrin mühafizə işlərinin yaxın bir həftə ərzində tamamlanması nəzərdə tutulur. Heykəllərin açılması isə Ukrayna-Rusiya müharibəsi başa çatdıqdan sonra Azərbaycan dövlətinin qərarı ilə gerçəkləşə bilər.
