Bir çox insan səhər hazırladığı kofeni sonradan yenidən qızdıraraq içməyə üstünlük verir, lakin bu zaman içkinin dadının dəyişdiyini hiss edir. Mütəxəssislər bildirirlər ki, kofenin yenidən qızdırılması onun daha acı və zəif dada malik olmasına səbəb olur. AzPost RBC-Ukrayna-ya istinadla xəbər verir ki, bunun əsas səbəbi içkinin tərkibində baş verən kimyəvi dəyişikliklərdir.
Məlumata görə, kofe təkrar qızdırıldıqda onun tərkibində olan bəzi turşular parçalanır. Xüsusilə xlorogen turşusu istiliyin təsiri ilə dəyişir və bu da içkinin acılaşmasına gətirib çıxarır. Maraqlıdır ki, bu proses yalnız qızdırıldıqda deyil, kofe uzun müddət açıq halda qaldıqda da baş verə bilər.
Mütəxəssislər qeyd edirlər ki, kofenin sobada və ya mikrodalğalı sobada yenidən qızdırılması eyni nəticə verir. Mikrodalğalı sobanın üstünlüyü yalnız sürətli olmasıdır. Əgər kofe uzun müddət zəif odda qızdırılarsa, dadla yanaşı faydalı maddələrin də itirilməsi ehtimalı artır.
Kofeni yenidən qızdırmaq əvəzinə onu isti saxlamağın daha effektiv yolları mövcuddur. Keyfiyyətli termokrujka və ya termos kofenin temperaturunu uzun müddət qorumağa kömək edir. İstifadədən əvvəl termosun içinə 1–2 dəqiqə qaynar su töküb boşaltmaq tövsiyə olunur ki, daxili səth əvvəlcədən isinsin.
Bundan əlavə, qabın qapaqlı olması istilik itkisini azaldır, qalın divarlı fincanlar isə kofeni daha uzun müddət isti saxlayır. Mütəxəssislər həmçinin bildirirlər ki, kofeyə dərhal soyuq süd əlavə etmək onun temperaturunu tez aşağı salır və bu da dadına mənfi təsir göstərə bilər.
Beləliklə, kofenin dadını qorumaq üçün onu təkrar qızdırmaq əvəzinə düzgün saxlanma üsullarına üstünlük vermək daha məqsədəuyğun hesab olunur.
