Bir çox insan bir qədər büzüşmüş və ya köhnəlmiş almaları yararsız hesab edib atır. Halbuki bu meyvələrdən həm faydalı, həm də dadlı qəlyanaltı hazırlamaq mümkündür.
AzPost Daily Star nəşrinə istinadla xəbər verir ki, sosial şəbəkədə yayılan məşhur bir məsləhət köhnə almaların qurudularaq sağlam qəlyanaltıya çevrilə biləcəyini göstərib. Qurudulmuş almalar vitaminlər, minerallar və xüsusilə liflə zəngin hesab olunur.
Mütəxəssislərin sözlərinə görə, almada olan həll olunan lif qanda “pis” xolesterinin səviyyəsinin azalmasına və şəkərin sabit qalmasına kömək edir. Həll olunmayan lif isə həzm sisteminin normal fəaliyyətini dəstəkləyir. Araşdırmalar göstərir ki, gündə iki alma qəbul etmək qan damarlarının fəaliyyətinə müsbət təsir göstərə və xolesterin səviyyəsini azalda bilər.
Almanın faydasının əsas səbəblərindən biri onun tərkibində olan pektin maddəsidir. Bu maddə bağırsaqlarda xolesterinlə birləşərək onun orqanizmdən çıxarılmasına kömək edir və ümumi xolesterin səviyyəsinin azalmasına təsir göstərə bilər.
Köhnə almadan faydalı qəlyanaltı hazırlamaq üçün onu qabıq və tum hissəsindən təmizləyib nazik dilimlərə kəsmək və sobada, quruducuda və ya hava fritözündə xırtıldayanadək qurutmaq kifayətdir.
Alma qalıqlarından istifadə etməyin başqa bir yolu isə ev şəraitində alma sirkəsi hazırlamaqdır. Bunun üçün alma qabıqları və tum hissələri bankaya qoyulur, üzərinə az miqdarda şəkər qatılmış su əlavə edilir və qarışıq 3–4 həftə fermentasiya üçün saxlanılır.
Mütəxəssislər bildirirlər ki, alma sirkəsi bəzi hallarda qan şəkərinin və xolesterinin səviyyəsinə müsbət təsir göstərə bilər. Lakin onun su ilə durulaşdırılaraq və az miqdarda istifadə edilməsi tövsiyə olunur.
