Müştəri Vüqar İskəndərov “Kontakt Home” mağazalar şəbəkəsindən aldığı kondisionerlə bağlı sosial mediada narazılığını bildirib.
AzPost xəbər verir ki, onun sözlərinə görə, beş gün öncə aldığı məhsul evə çatdırılsa da, quraşdırılma işi hələ də həyata keçirilməyib.
Müştəri qeyd edir ki, nə müştəri xidmətləri, nə də texniki quraşdırma ustaları vədlərinə əməl edir: “Hamı peşəkarcasına yalnız yalan danışır. Peşəkarlıq yalnız satışda görünür, sonrası unudulur”.
V. İskəndərov bu vəziyyətdən narazı qaldığını vurğulayaraq, həmin mağazadan bir daha heç nə almayacağını bəyan edib: “Bundan sonra bir çöp də almaram. Əlimdən gələni edəcəyəm ki, ətrafımdakı insanlar da ordan uzaq dursun”.
O, mağazanın xidmət səviyyəsini tənqid edərək qeyd edib ki, insanların pulu qarşılığında onlara yalnız zaman itkisi və əsəb təqdim olunur. Müştəri həmçinin vurğulayıb: “Ən böyük məişət avadanlığı şəbəkəsi ola bilərsiz, amma ən bərbad dəyərləri formalaşdırmısız”.
Qarşı tərəfin mövqeyini dərc etməyə hazırıq.
