Kredit
Azərbaycanda kredit götürən vətəndaşların ən çox verdiyi suallardan biri budur: “Mən hər ay ödəniş edirəm, amma qalan məbləği birdən ödəyib borcu tam bağlaya bilərəmmi?”
Məsələn, bir müştərinin 250 manat borcu qalıb. Müqaviləyə əsasən o, hər ay 50 manat ödəməlidir. Amma vətəndaş artıq aylıqdan çox – məsələn, 90 manat ödəyir və sual edir: gələn ay 250 manatı birdən verib krediti bağlaya bilərmi?
AzPost xəbər verir ki, maliyyə mütəxəssislərinin sözlərinə görə, “İstehlak kreditləri haqqında” Qanun və Mülki Məcəllənin müvafiq maddələrinə əsasən, borcalan kreditini vaxtından əvvəl tam və ya qismən ödəmək hüququna malikdir. Bu zaman bank və ya kredit təşkilatı müştərinin müraciətini qəbul etməlidir.
Burada diqqət edilməli əsas məqamlar:
-
Müştəri vaxtından əvvəl ödəniş etmək istədikdə, bunu rəsmi qaydada banka bildirməlidir;
-
Kredit tam bağlanarsa, gələcək aylara hesablanan faizlər tutulmur;
-
Əgər kredit müqaviləsində vaxtından əvvəl ödəniş üçün əlavə cərimə və ya komissiya nəzərdə tutulmayıbsa, bank müştəridən əlavə ödəniş tələb edə bilməz;
-
Qismən ödəniş edilərsə, ya aylıq ödəniş məbləği azalır, ya da kreditin müddəti qısalır – bu seçim müqavilədə göstərilir.
Hüquqşünasların sözlərinə görə, hər bir müştəri müqaviləni diqqətlə oxumalı və vaxtından əvvəl ödənişlə bağlı şərtlərə baxmalıdır. Əgər müqavilədə bu barədə məhdudiyyət qoyulubsa, həmin şərt qanunsuz hesab edilə bilər, çünki qanun borcalana belə bir hüquq tanıyır.
Beləliklə, qalan məbləği bir dəfəyə ödəməklə krediti vaxtından əvvəl bağlamaq mümkündür. Sadəcə bankı əvvəlcədən məlumatlandırmaq və hesablamanı dəqiqləşdirmək kifayətdir.
