Lənkəranda meşəlik ərazidə iki şəxsin meyitinin aşkar edilməsi ilə bağlı cinayət işi başlanıb.
Baş Prokurorluğun Mətbuat xidmətindən bildirilib ki, hadisə ilə bağlı məlumat avqustun 11-də Lənkəran rayonunun Haftoni kəndi yaxınlığındakı meşəlik ərazidə iki nəfərin meyitinin tapılması barədə rayon prokurorluğuna daxil olub.
İlkin araşdırmalar zamanı meyitlərin 1997-ci il təvəllüdlü Mirzəyev Xəzər Vurğun oğlu və 2010-cu il təvəllüdlü Məmmədova Fidan Şahid qızı olduğu müəyyənləşdirilib.
Faktla bağlı Lənkəran rayon prokurorluğunda Azərbaycan Respublikası Cinayət Məcəlləsinin 125-ci maddəsi (özünü öldürmə həddinə çatdırma) ilə cinayət işi başlanıb.
Hazırda istintaq çərçivəsində hadisənin bütün halları, o cümlədən şəxslərin ölüm səbəbləri və şəraiti araşdırılır. Bununla əlaqədar müvafiq ekspertizalar təyin edilib.
Baş Prokurorluğun məlumatına görə, aidiyyəti dövlət qurumları, o cümlədən daxili işlər orqanlarının əməkdaşları ilə birgə zəruri istintaq və əməliyyat-axtarış tədbirləri davam etdirilir.
