Son günlər sosial şəbəkələrdə Leobank müştəriləri arasında kart təhlükəsizliyi ilə bağlı narazılıqlar səslənir.
AzPost xəbər verir ki, istifadəçilər iddia edirlər ki, kartlarından ödəniş çıxıldığı halda onlara nə təsdiq SMS-i, nə də 3D Secure kodu göndərilir.
Şikayətçilərdən biri qeyd edib ki, Leo kartından tanımadığı bir mağaza üzrə ödəniş aparılıb: “Mən kartımı heç bir onlayn mağazada və ya saytda qeydiyyatdan keçirməmişəm. Buna baxmayaraq, vəsait çıxıldı. Ən təəccüblüsü isə odur ki, pul çıxılan zaman mənə heç bir təsdiq bildirişi gəlmədi”.
Məsələ ilə bağlı Leobank sosial şəbəkələr üzərindən belə cavab verib: “İstəməzdik ki, belə bir hal ilə qarşılaşasınız. Təəssüf ki, sizinlə əlaqə yaratmaq mümkün deyil. Məlumatlarınızı yoxlamaq və sizə daha ətraflı cavab təqdim etmək üçün şəxsi qutumuza müraciət etməyinizi xahiş edirik”.
Maliyyə mütəxəssisləri isə bildirirlər ki, bu cür hallarda müştəri dərhal bankla əlaqə saxlamalı və kartını ləğv etdirərək yenisi ilə əvəzləməlidir: “Çox güman ki, kart məlumatları kənar şəxslərin əlinə keçib. Kart sahibləri vaxt itirmədən bankla əlaqə saxlamalıdır”.
Qanunvericiliyə görə, kart sahibinin təsdiqi olmadan aparılan əməliyyatlar etibarsız hesab olunur və bu halda məsələ bank tərəfindən araşdırılmalı, müştərinin hüquqları qorunmalıdır.
