Leobankın xidmətlərindən istifadə edən bir müştəri sosial şəbəkələrdə bankdan narazılığını ifadə edib.
AzPost xəbər verir ki, vətəndaş kredit rəsmiləşdirmək üçün müraciət etdiyini, tələb olunan bütün prosedurları – videozəng, sənəd təsdiqi və digər mərhələləri uğurla keçdiyini bildirib.
Onun sözlərinə görə, son mərhələdə bank tərəfindən şərt qoyularaq 24 saat ərzində adında olan bütün kredit kartlarının bağlanılması tələb edilib. Müştəri həmin gün borc alaraq kartlarını bağladığını və bu barədə müvafiq arayışları Leobank-a təqdim etdiyini vurğulayıb. Lakin artıq beş gündür vəsaitin köçürülmədiyini, yalnız “iş icradadır” cavabı aldığını qeyd edib.
“Bütün kartlarımı bağlatdırdım, indi isə nə kredit verilir, nə də dəqiq cavab. Zəng vuranda hər dəfə eyni söz deyirlər – iş icradadır”, – deyə müştəri açıqlamasında bildirib.
Məsələ ilə bağlı Leobank da mövqeyini açıqlayıb. Bankdan verilən məlumatda bildirilir:
“Üzləşdiyiniz çətinliyə görə təəssüf edirik. Lakin şəxsi məlumatlarınız qeyd olunmadığı üçün müraciətinizi yoxlamaq mümkün deyil. Sizə kömək göstərmək üçün ismarıc bölməsinə müraciət etməyiniz xahiş olunur”.
