Sovet və moldovalı tanınmış aktrisa Nina Doni 89 yaşında dünyasını dəyişib.
AzPost xəbər verir ki, bu barədə məlumatı Kişinevdə fəaliyyət göstərən Respublika “Luceafărul” Teatrının mətbuat xidməti yayıb.
Nina Doni teatr və televiziya tamaşalarındakı çıxışları ilə geniş tamaşaçı sevgisi qazanıb. O, xüsusən “Radosti zemnıe” teleserialındakı rolu, həmçinin “Poleyvıe tsvetı” və “Jenitba” səhnə əsərlərindəki ifası ilə yadda qalıb. Onun yaradıcılığı Moldovanın və ümumilikdə SSRİ-nin mədəni həyatında iz qoyub.
Teatr rəhbərliyi aktrisanın vəfatı ilə bağlı ailəsinə, yaxınlarına və həmkarlarına başsağlığı verərək, onun sənətə olan xidmətlərini yüksək qiymətləndirdiklərini bildirib.
Nina Doni 9 may 1936-cı ildə Moldovada anadan olub. O, Moskvadakı B.Şukin adına teatr məktəbini bitirdikdən sonra vətəninə qayıdaraq teatr fəaliyyətinə başlayıb. Daha sonra həmkarları ilə birlikdə Respublika “Luceafărul” Teatrının əsasını qoyub. Bu teatr uzun illər boyu Kişinevin mədəniyyət ocaqlarından biri kimi fəaliyyət göstərib və minlərlə tamaşaçını səhnə sənətinə cəlb edib.
