Rusiyada tanınmış müğənni Oleg Qazmanov və onun həyat yoldaşını aldatmaqda ittiham olunan erməni əsilli Gevorq Sərkisyanın anası da cinayət işinə cəlb olunub.
AzPost xəbər verir ki, məhkəmə sənədlərinə əsasən, Dina Sərkisyan Rusiya Cinayət Məcəlləsinin 159-cu maddəsinin 4-cü bəndi (xüsusilə böyük miqdarda dələduzluq) üzrə axtarışa verilib.
Xatırladaq ki, Gevorq Sərkisyan 2020-ci ildə Moskvada saxlanılıb. O, Qazmanov ailəsinə və digər şəxslərə qaytarmadığı iri məbləğdə vəsaitləri mənimsəməkdə təqsirləndirilir. İstintaq materiallarına görə, 2019-cu ildə müğənni və həyat yoldaşı ona pensiya üçün yığdıqları pulları borc verib, lakin vəsait geri qaytarılmayıb.
İş üzrə digər zərərçəkənlər də var. Onlardan biri – Qazmanovun tanışı Marina Lebedeva bildirib ki, Sərkisyan özünü uğurlu biznesmen kimi təqdim edərək, guya ABŞ-da həyata keçiriləcək layihəyə sərmayə yatırmağı təklif edib. Lakin bu layihə heç vaxt reallaşmayıb.
Hazırda araşdırmalar davam edir, hüquq-mühafizə orqanları digər şəxslərin də işə mümkün bağlılığını yoxlayır.
