“Məktəblərə direktorlar qapalı yolla kənardan təyin olunur” –Deputat faktları açıqladı

“Ümumtəhsil məktəblərinin özündə çalışan direktor müavinləri təyinatdan kənarda qalır, boşalan direktor yerlərinə kənar məktəblərdən direktor müavinləri təyinat alırlar. Bu isə kollektivdə intriqaların yaranmasına, idarəçilik ənənələrinin pozulmasına və bütün dünyada qəbul olunmuş sosial lift prinsipinin ayaqlar altına atılmasına səbəb olur”.
Azpost.info bildirir ki, bu barədə Milli Məclisin deputatı Etibar Əliyev META-da açıqlama ilə çıxış edib.
Onun sözlərinə görə, son zamanlar ümumtəhsil məktəblərində baş verən neqativ hallar Milli Məclisin Elm və Təhsil Komitəsinin üzvü kimi onu  çox narahat edir. Məktəb direktorlarının təyinatında yol verilən ciddi qanun pozuntuları neqativ halların dərinləşməsinə səbəb olur: “Konkret olaraq iki nümunə göstərəcəm. 210 nömrəli tam orta məktəbə direktor vəzifəsinə 95 nömrəli tam orta məktəbdə direktor müavini işləyən Həqiqət Gülalıyeva birbaşa təyin olunub. 165 nömrəli tam orta məktəbə isə 252 nömrəli məktəbdə cəmi 1 ilə yaxın direktor müavini işləmiş Ruslan Nağıyev birbaşa təyin olunub. Bildiyimiz kimi, ümumtəhsil məktəblərinə direktor vəzifəsinə təyinat təcrübəsi, şəxsi bacarıq və keyfiyyətləri əsas götürülməklə təlimlərə cəlb olunduqdan sonra müvafiq imtahan və müsabiqələrdən keçən şəxslər təyinat almalıdırlar. Verilən məlumatlara görə, hər iki şəxs faktiki olaraq imtahan və müsahibələrdə iştirak etməyiblər. Belə halların sayı çoxdur. Və həmçinin qapalı və mübhəm direktor təyinatları geniş vüsət alıb”-deyə deputat vurğulayıb.
Əvvəlki məqalə

Yaponiyada dünən COVİD-19-a 35 min yeni yoluxma qeydə alınıb

Sonrakı məqalə

Bakı-Naxçıvan təyyarəsi tufan səbəbilə geri qayıdıb