Qabyuyan
Yeni araşdırmalar gündəlik istifadə etdiyimiz mətbəx əşyalarının sağlamlığımıza ciddi təhlükə yaratdığını üzə çıxarıb.
AzPost bildirir ki, mətbəx çoxları üçün evin ən ləzzətli guşəsi sayılsa da, alimlər xəbərdarlıq edirlər ki, burada gizlənən görünməz təhlükələr insan sağlamlığını risk altına atır. Son elmi məlumatlara əsasən, tezgahdan tutmuş qabyuyan maşına qədər bir çox məişət texnikası demans, xərçəng və sepsis kimi xəstəliklərlə əlaqələndirilir. Xəstəliklərə Nəzarət və Qarşısının Alınması Mərkəzləri (CDC) bildirir ki, yalnız ABŞ-da hər il qida ilə əlaqəli xəstəliklər səbəbindən üç minə yaxın insan həyatını itirir.
Mütəxəssislərin xüsusi vurğuladığı məqam qabyuyan maşının yaratdığı təhlükədir. Kvinslend Universitetinin alimləri araşdırmalarında qeyd ediblər ki, plastik qabların qabyuyan maşında yuyulması nəticəsində zəhərli mikroplastiklər yaranır. Bu hissəciklər qan-beyin baryerini keçə bilir və demans riskini artırır. Hətta bu mikroplastiklər xərçəng, infarkt və sonsuzluq kimi fəsadlara da səbəb ola bilər.
Süngərlər, qabuyuyanlar, dəzgahlar və kəsmə lövhələri də bakteriya mənbəyi sayılır. Süngərin hər kvadrat santimetrində milyardlarla mikrob yaşayır ki, bunların arasında Staphylococcus aureus və Pseudomonas aeruginosa kimi təhlükəli bakteriyalar var. Lavaboların isə tualetdən daha çirkli olduğu aşkarlanıb. Ən böyük təhlükə isə çiy ətlə işlədilən, sonra yuyulmadan tərəvəz üçün istifadə edilən doğrama taxtalarından gəlir.
Böyük Britaniyada aparılan tədqiqat plastik doğrama taxtalarının istifadəsinin daha riskli olduğunu göstərib. Ekspertlər taxta lövhələrin nisbətən təhlükəsiz olduğunu bildirirlər, lakin onların da gigiyenik saxlanması vacibdir.
