“Ekoloq” Ətraf Mühitin Qorunmasına Yardım İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Məişət tullantılarının idarə olunmasında səmərəliliyin artırılması təşəbbüsləri” adlı layihəni icra edir.
Layihənin əsas məqsədi regionlarda məişət tullantılarının idarə olunması sahəsində mövcud vəziyyəti monitorinq etmək, real vəziyyəti qiymətləndirmək və müvafiq hesabat sənədi hazırlamaqdır. Eyni zamanda, vətəndaşlar arasında məişət tullantılarının idarə olunması və çeşidlənməsi ilə bağlı maarifləndirici təbliğat kampaniyalarının aparılması da nəzərdə tutulur.
Layihə çərçivəsində “Ekoloq” Ətraf Mühitin Qorunmasına Yardım İctimai Birliyinin peşəkar ekspertləri tərəfindən Saatlı və İmişli rayonlarında məişət tullantılarının idarə olunması, çeşidlənməsi və utilizasiyası prosesləri monitorinq edilmiş, çöl tədqiqat işləri aparılmışdır.
Monitorinqlər zamanı əldə olunan nəticələr, foto və video materiallar göstərir ki, hər iki rayonda vəziyyət kritik və təhlükəli səviyyədədir. Saatlı rayonunda “Məişət tullantılarının idarə olunması poliqonu” inşa edilmişdir, lakin mövcud infrastruktur yetərli sahəyə malik deyil. Ərazidə qismən çeşidlənmə aparılsa da, bir neçə kilometr ərazi çeşidlənməmiş qarışıq tullantılarla örtülmüşdür.
Tullantı poliqonları şəhər kənarında, Araz çayı sahilinə yaxın və yaşayış məntəqələrinə yaxın ərazilərdə yerləşir. Poliqonlarda tullantıların çeşidlənmədən yandırılması halları müşahidə edilmişdir. Bu vəziyyət Araz çayı hövzəsində ciddi ekoloji təhlükə yaradır.
Ekologiya və Təbii Sərvətlər Nazirliyi, eləcə də müvafiq rayon icra hakimiyyəti və bələdiyyə qurumları tərəfindən bu istiqamətdə təcili və təxirəsalınmaz tədbirlərin görülməsi vacib hesab olunur.
Monitorinqlərin nəticələri əsasında yekun hesabat hazırlanacaq və ictimaiyyətə, eləcə də aidiyyəti dövlət qurumlarına təqdim olunacaqdır.
Fotolar
