Dünyada son illərin ən geniş coğrafiyanı əhatə edən hantavirus yayılması müşahidə olunur. Əvvəllər belə yoluxmalar əsasən bir və ya iki qonşu ölkə ilə məhdudlaşsa da, hazırda virusun müxtəlif ölkələrdə qeydə alınması beynəlxalq səhiyyə qurumlarının diqqətini artırıb.
AzPost xarici mətbuata istinadla xəbər verir ki, immunoloq Nikolay Kryuçkov insanların aktiv miqrasiyasının virusun yayılmasını sürətləndirdiyini bildirib. Onun sözlərinə görə, müxtəlif ölkələr arasında intensiv səfərlər infeksiyanın nəzarətdə saxlanılmasını çətinləşdirir və vəziyyətin diqqətlə izlənməsini zəruri edir.
Mütəxəssis qeyd edib ki, hazırkı vəziyyət ciddi olsa da, hələ epidemiya və ya pandemiya həddinə çatmayıb. Bununla belə, hantavirusa qarşı təsdiqlənmiş spesifik antiviral preparatın və effektiv vaksinin olmaması əsas problem hesab edilir. Hazırda xəstəliyin qarşısını alan xüsusi profilaktik vasitələrin də mövcud olmadığı vurğulanır.
İmmunoloqun sözlərinə görə, ən vacib məsələ xəstəliyin erkən mərhələdə aşkarlanmasıdır. Vaxtında diaqnoz qoyulan xəstələrin reanimasiya və intensiv terapiya şəraitində nəzarətdə saxlanılması həyati əhəmiyyət daşıyır. Ekspert bildirib ki, ağır simptomlar inkişaf etdikdə ölüm riski regiondan və tibbi imkanlardan asılı olaraq 25–40 faiz arasında dəyişə bilər.
Həkimlər insanlara xüsusilə gəmiricilərlə təmasdan ehtiyatlı olmağı, qapalı və tozlu məkanlarda qoruyucu vasitələrdən istifadə etməyi, yüksək hərarət, halsızlıq və tənəffüs problemləri zamanı isə dərhal tibbi yardıma müraciət etməyi tövsiyə edirlər.
