Macarıstan hökuməti Alyansın Ukraynadakı hərbi missiyasında iştirak etmək istəmədiyi üçün ölkəsinin NATO-dakı roluna yenidən baxır.
Azpost.info xəbər verir ki, bunu Macarıstanın Baş naziri Viktor Orban bildirib.
Orban onu da qeyd edib ki, Qərb siyasətçilərinin bəyanatları və mətbuatda dərc olunan nəşrlər Avropanın Rusiyaya qarşı müharibəyə hazırlaşdığını göstərir. Onun sözlərinə görə, Macarıstan buna qarşıdır: “Hökumətdə müharibədə iştirak etmədən NATO-nun üzvü olaraq necə qala biləcəyimizi müəyyən etmək üçün iş gedir”.
Hökumət başçısı etiraf edib ki, bu vəziyyət qəribə görünür, çünki bütün qeyd-şərtlərə baxmayaraq, Macarıstan Şimali Atlantika Alyansının üzvü olaraq qalmaq niyyətindədir.
“NATO tarixində bir üzv dövlətin Macarıstanın indiki kimi açıq şəkildə xüsusi mövqe tutduğu bir çox vəziyyət olmayıb. Ona görə də onun Alyansdakı roluna yenidən baxılmalıdır. Hazırda hüquqşünaslarımız və hərbçilərimiz bununla məşğuldur. Bu məsələni Macarıstan diplomatiyası həll etməlidir”, – Orban bildirib.
Eyni zamanda o, Macarıstanın NATO-nun Ukraynada mümkün əməliyyatlarında iştirak etmək niyyətində olmadığını təkrarlayıb. Ölkə bunun üçün vəsait ayırmayacaq, ora silah göndərməyəcək, hətta Ukrayna ordusu üçün nəzərdə tutulan silahların saxlanması üçün ərazisini belə, ayırmayacaq.
“Bu mövqe Ukraynadakı münaqişənin hərbi yolla həll edilə bilməyəcəyi, qalibin ola bilməyəcəyi, yalnız sülh danışıqları yolu ilə həll oluna biləcəyi qənaətindən irəli gəlir”, – Orban qeyd edib.
Azpost.info
