Miqren
Miqren müxtəlif səbəblərlə başlaya bilən baş ağrısı növüdür. AzPost xəbər verir ki, Seçenov Universitetinin professoru, nevroloq Marqarita Naprienko açıqlamasında bildirib ki, bu xəstəlik ən çox səbəb yaradan amillərlə xarakterizə olunur.
Mütəxəssis deyir ki, bəzən xəstələr “məndə hər şeydən baş ağrısı tutur” söyləyəndə, bu artıq miqrenin klassik göstəricisidir. Havanın dəyişməsi, aclıq və ya həddindən artıq yemək, az yatmaq və ya uzun yuxu – bütün bunlar tutmanı başlada bilər.
Professorun sözlərinə görə, bəzi adi qidalar da miqren üçün səbəb ola bilir. Məsələn, sərt pendirlər, şokolad və qırmızı şərab bir çox insanda ağrını gücləndirən amillər arasında yer alır. Lakin bu məhsullar hər kəsdə eyni təsir göstərmir və fərdi olaraq özünü göstərir.
Həkim onu da bildirib ki, uzun müddət ac qalmaq və çox sərt pəhrizlər də təhlükəlidir. Belə hallarda qanda şəkərin azalması beyin damarlarının fəaliyyətinə təsir edir və miqren tutmasına yol aça bilər.
