Misir
Misirdə aparılan arxeoloji qazıntılar zamanı 3500 ildən çox yaşı olan üç qədim məzar üzə çıxarılıb. AzPost xəbər verir ki, bu barədə məlumat Misirin Qədim Əsərlər üzrə Ali Şurası və Turizm Nazirliyi tərəfindən təsdiqlənib.
Yeni tapıntılar ölkənin cənubundakı məşhur Luksor şəhərində, Dra Əbu əl-Naqa nekropolunda aşkar edilib. Qazıntılar zamanı məlum olub ki, bu məzarlar Yeni Krallıq dövrünə — təxminən eramızdan əvvəl 1550-ci ilə aiddir. Məzarların içərisindəki kitabələrdə qəbir sahiblərinin adları və vəzifələri də qeyd olunub.
Misirin Qədim Əsərlər üzrə Ali Şurasının baş katibi Məhəmməd İsmayıl Xalid bildirib ki, bu tapıntılar qədim Misir tarixinin bəzi qaranlıq məqamlarını aydınlaşdırmağa imkan verəcək. Onun sözlərinə görə, məzarlardan əldə edilən yazıların əlavə təhlilinə ehtiyac var.
Məlumata görə, əsasən dağıdılmış məzarlardan biri Ramessid dövrünə aid Amum em-İpet adlı şəxsə məxsusdur. Qəbir divarlarında cənazə mərasimləri və ziyafət səhnələri təsvir olunub. Digər iki türbə isə 18-ci sülaləyə aiddir. Onlardan biri Baki adlı taxıl anbarının mühafizəçisinə, digəri isə Amun məbədinin baxıcısı, yazıçı və şimal vahələrinin meri olmuş S adlı şəxsə məxsusdur.
Qeyd edək ki, türbələrdə müxtəlif artefaktlar, heykəllər və qədim dəfn əşyaları da aşkar edilib. Misirin Turizm və Qədim Əsərlər naziri Şerif Fathir bu tapıntını ölkə üçün mühüm elmi və arxeoloji hadisə kimi dəyərləndirib.
Onun sözlərinə görə, bu kəşf gələcəkdə Misirdə mədəni turizmin inkişafına təkan verəcək və qədim sivilizasiya tarixinin daha geniş miqyasda öyrənilməsinə imkan yaradacaq. Qeyd edək ki, son illər Luksor və ətraf ərazilərdə bir sıra mühüm arxeoloji kəşflər edilib.
