MTN generalı Elçin Quliyev və digərlərinin kassasiya şikayəti təmin edilməyib

01 Dekabr 2020 - 10:48

Ləğv edilmiş Milli Təhlükəsizlik Nazirliyi (MTN) Antiterror Mərkəzinin rəisi olmuş general-mayor Elçin Quliyev, Mərkəzin əməkdaşı, polkovnik Azər Mehdiyevin, Antiterror Mərkəzinin rəis müavini vəzifəsində çalışmış, polkovnik İlqar Əliyevin qanuni nümayəndəsinin kassasiya şikayəti üzrə məhkəmə prosesi keçirilib.

 Ali Məhkəmədə hakim İnqilab Nəsirovun sədrliyi ilə keçirilən prosesdə qərar elan edilib.

Qərara əsasən, təqsirləndirilən şəxslərin şikayəti təmin edilməyib.

Qeyd edək ki, Bakı Hərbi Məhkəməsinin hökmü ilə Elçin Quliyev 10 il 6 ay, Azər Mehdiyev isə 8 il azadlıqdan məhrum ediliblər.

İlqar Əliyev isə saxlandığı İstintaq Təcridxanasında intihar edib. İlqar Əliyevin intihar etməsi ilə bağlı onun barəsində olan cinayət təqibinə xitam verilib.

Lakin Bakı Hərbi Məhkəməsinin hökmü ilə onun əmlaklarına həbs qoyulub.

Xatırladaq ki, E.Quliyev 2015-ci ildə həbs ediliblər. Məhkəmə onun rütbədən məhrum edilməsi barədə ölkə Prezidentinə təqdimat göndərilməsi haqqında qərar qəbul edib. E.Quliyevə qarşı Dövlət Təhlükəsizlik Xidmətinin 7 milyon manatlıq mülki iddiası təmin olunub. Təqsirləndirilən şəxsin üzərinə həbs qoyulmuş mülklərinin müsadirə olunması barədə də qərar qəbul edilib.

 Hökmdən narazı qalan Elçin Quliyev, Azər Mehdiyev və əmlakları mühasirə olunan İlqar Əliyev qanuni nümayəndəsi apelyasiya şikayəti verib. Bakı Apelyasiya Məhkəməsi isə təqsirləndirilən şəxslərin apelyasiya şikayətini təmin etməyib, hökmü qüvvədə saxlayıb. Bundan sonra Ali Məhkəməyə kassasiya şikayəti verib. (APA)