Azərbaycan Uşaq Hüquqları Müdafiəsi Liqası İctimai Birliyi tərəfindən, Qeyri-Hökumət Təşkilatlarına Dövlət Dəstəyi Agentliyinin dəstəyi ilə həyata keçirilən “Müharibə uşaqların gözü ilə” layihəsi uğurla başa çatdı.
Layihənin əsas məqsədi 1993-cü ildə İctimai Birlik tərəfindən Təhsil Nazirliyi ilə birgə təşkil olunmuş 20 Yanvar faciəsinə həsr edilmiş inşa müsabiqəsinin materiallarını gələcək nəsillərə çatdırmaq, həmçinin zəfər qazanmış xalqımızın mübarizəsini, ordumuzun qəhrəmanlığını və xalqımızın birliyini yeni baxış bucağında təqdim etmək idi.
Layihə çərçivəsində toplanmış materiallar əsasında “20 Yanvar uşaqların gözü ilə” adlı kitab nəşr olunmuşdur. Kitabda 20 Yanvar gecəsinin qanlı yaddaşı, milli azadlıq uğrunda şəhid olmuş qəhrəmanlarımızın hekayələri, valideynlərini itirmiş uşaqların fəryadı və hadisələrin canlı şahidi olmuş məktəblilərin xatirələri öz əksini tapıb.
Layihənin bağlanış mərasimi və kitab təqdimatı “New Baku” hotelində baş tutmuşdur. Tədbirdə müxtəlif təşkilatların nümayəndələri, müəllimlər, ictimai xadimlər, tələbələr və media nümayəndələri iştirak etmişdir. Tədbirin aparıcısı Avropa Azərbaycan Məktəbinin müəllimi Abdullayeva İlhamə, çıxış edənlər- UHML-nin sədri Yusif Bəkirov, Heydər Əliyev adına liseyin müəlliməsi Xələfli Hökumə və 62 saylı məktəb liseyin şagirdi Həsənli Aylin Şahin qızı. Çıxış edənlər kitabdan inşalar oxumuş və bu cür layihələrin gənc nəsildə vətənpərvərlik ruhunun gücləndirilməsində, tarixi yaddaşın qorunub saxlanılmasında mühüm rol oynadığını vurğulamışlar. Tədbirin sonunda Suraxanı rayonu 285 nömrəli məktəbin ibtidai sinif müəllimi Qiyasi Yeganə xanım öz bəsətələdiyi “Körpələr ağlamasın” mahnısını oxudu və UHML-nin sədri Yusif Bəkirov kitabları imzaladı
Azərbaycan Uşaq Hüquqları Müdafiəsi Liqası İctimai Birliyi layihəyə dəstək göstərdiyinə görə Qeyri-Hökumət Təşkilatlarına Dövlət Dəstəyi Agentliyinə təşəkkürünü bildirir.
