Mərakeşdə “GenZ 212” gənclər hərəkatının təşəbbüsü ilə sentyabrın 27-dən başlanan etiraz aksiyaları davam edir. Etirazçılar səhiyyə və təhsil sistemlərinin təkmilləşdirilməsini, eləcə də baş nazir Əziz Ahannuşun istefasını tələb edirlər.
AzPost bildirir ki, narazılığın əsas mənbəyi səkkiz qadının Ağadirdəki xəstəxanada doğuş zamanı ölməsi olub. Bu, ictimaiyyətin qəzəbinə səbəb olub. Etirazçılar həmçinin 2030-cu il dünya çempionatına hazırlığın yüksək xərclərindən narazılıqlarını ifadə edirlər.
Oktyabrın 1-də polislə toqquşma zamanı iki nəfər həlak olub və bu, zorakılığın daha da genişlənməsinə gətirib çıxarıb. Təhlükəsizlik qüvvələrinin silah ələ keçirməyə cəhd göstərən bir qrup nümayişçiyə atəş açması ictimai qınağa səbəb olub. Mərakeş Daxili İşlər Nazirliyi atışmanın hücuma cavab olduğunu bildirib.
Etirazçıların 70 faizinin azyaşlı olduğu bildirilir. Etirazlar TikTok və Discord vasitəsilə əlaqələndirilir. Son məlumatlara görə, etirazlar zamanı azı 3 nəfər ölüb. 263-ü təhlükəsizlik işçisi olmaqla, 350-dən çox insan yaralanıb. İğtişaşlarda iştirak etdiyinə görə 1000-dən çox insan həbs edilib.
Mərakeşdə etirazçılar Kral VI Məhəmmədin portretlərini yandırıblar.
Qeyd edək ki, Mərakeş rəsmi olaraq konstitusion monarxiyadır. Lakin kral hökumətin qanunvericilik, icraedici və məhkəmə qollarında əhəmiyyətli səlahiyyətlərə malikdir.
VI Məhəmməd dövlət başçısı, silahlı qüvvələrin baş komandanı və ölkənin ruhani lideridir, “Əmirəl-möminin” (“Əmirəl-möminin”) tituluna malikdir.
