Azərbaycanın telekommunikasiya və poçt sahələri üzrə tənzimləyici qurumu olan Rəqəmsal İnkişaf və Nəqliyyat Nazirliyinin tabeliyindəki İnformasiya Kommunikasiya Texnologiyaları Agentliyinin (İKTA) əməkdaşları ilə “Starlink” şirkətinin nümayəndələri arasında onlayn görüş keçirilib.
Görüşdə “Starlink”in bazara giriş üzrə direktoru Rebeka Hanter və “Starlink Azerbaijan” MMC-nin nümayəndələri iştirak ediblər.
İKTA rəsmiləri ilk olaraq tənzimləyici qurumun əsas vəzifə və səlahiyyətləri haqqında məlumat veriblər. Daha sonra qeyd edilib ki, telekommunikasiya operatoru kimi “Starlink Azerbaijan” MMC də fəaliyyətinin müxtəlif aspektlərini əks etdirən hesabat təqdim etməlidir.
Görüş zamanı peyk telekommunikasiya operatorunun Agentliyə təqdim edəcəyi hesabat formaları, onların təqdim edilməsi qaydaları və digər vacib məsələlər haqqında müzakirələr aparılıb.
Eyni zamanda İKTA-nın fəaliyyəti, Azərbaycan telekommunikasiya mühiti və başqa maraq doğuran mövzular ətrafında “Starlink” nümayəndələrinin sualları cavablandırılıb.
“Son zamanlar bu tənzimləyici qurum yalnız sektorun ictimaiyyətini təəccübləndirməyə üstünlük verir”.
AzPost bildirir ki, bu sözləri Azərbaycan İnternet Forumunun prezidenti Osman Gündüz bu məlumatı şərh edərkən bildirib.
““Starlink Azerbaijan” hələ bazara yeni daxil olub, necə deyərlər, hələ “bismillah” deməyib. Belə bir vaxtda qurum rəhbərliyi ilə keçirilən görüşün əsas mövzusunu məhz bu hesabat məsələsi kimi təqdim etmək doğrudanmı məqsədəuyğundur?”
