25 illik fəaliyyəti dövründə Dövlət Neft Fondunun ehtiyatı 60 milyard dolları ötüb.
Azpost.az bildirir ki, bu barədə ARDNF-nin icraçı direktoru İsrafil Məmmədov AZƏRTAC-a müsahibəsində bildirib.
Onun sözlərinə görə, bu ehtiyatların formalaşmasında neft-qaz gəlirləri ilə yanaşı, Fondun investisiya fəaliyyətindən əldə olunan gəlirlər də iştirak edir.
Qlobal investor kimi Fond son onilliklərdə investisiya portfelinin diversifikasiyasını istiqraz, səhm, daşınmaz əmlak və qızıl kimi maliyyə aktivləri, həmçinin müxtəlif regionlar və valyutalar üzrə əhəmiyyətli dərəcədə genişləndirib. Belə ki, hazırda Fondun portfeli 50-dən çox ölkəni, 17 valyutanı, iqtisadiyyatın bütün sektorları üzrə minlərlə investisiya aktivlərini əhatə edir.
“Qeyd etmək istərdim ki, Dövlət Neft Fondunun aktivlərinin həcminin artması, habelə portfelin strukturunda orta və uzun müddətlərdə yüksək gəlirlilik vəd edən nisbətən daha riskli maliyyə alətlərinin əlavə edilməsi Fondun investisiya gəlirliliyinin artmasına müsbət təsir göstərib. Geridə qoyduğumuz müddət ərzində vəsaitlərin idarəedilməsindən əldə olunan gəlir artıq 15 milyard dolları ötüb”-deyə icraçı direktor vurğulayıb.
İ.Məmmədovun sözlərinə görə, ötən 25 ildə Fond yaradılma məqsədlərinə uyğun olaraq gələcək nəsillər üçün yığım funksiyasını həyata keçirməklə yanaşı, həm də bugünkü nəsillərə xidmət göstərib – ölkənin makroiqtisadi sabitliyinin qorunmasında mühüm mövqe tutub: “Məcmu vəsaitləri ölkənin Ümumi Daxili Məhsulunun 80 faizini keçən və xarici dövlət borcuna nisbətən 10 dəfədən çox olan Fond ölkə iqtisadiyyatı üçün “təhlükəsizlik yastığı” rolunu oynayıb”.
