Azərbaycan Mühasiblər və Risk Peşəkarları Assosiasiyası (ARPA) İctimai Birliyi tərəfindən Qeyri-Hökumət Təşkilatlarına Dövlət Dəstəyi Agentliyi və BP Azərbaycanın maliyyə dəstəyi ilə Neftçala rayonunda iqlim risklərinin qiymətləndirilməsi, yaşıl maliyyə və ESG (Ətraf Mühit, Sosial və Korporativ İdarəetmə) yanaşmalarının təşviqinə yönəlmiş yeni layihənin icrasına başlanılıb.
QHT.az xəbər verir ki, layihənin əsas məqsədi Neftçala rayonunda iqlim dəyişikliklərinin yaratdığı risklərin qiymətləndirilməsi, bu risklərin sosial-iqtisadi təsirlərinin təhlili, yaşıl maliyyə alətlərinin tətbiq imkanlarının təşviqi və yerli səviyyədə iqlimə davamlı idarəetmə yanaşmalarının inkişafına dəstək göstərməkdir.
İqlim dəyişiklikləri bu gün təkcə ekoloji değil, həm də iqtisadi və sosial inkişaf üçün mühüm çağırışlardan biridir. Xüsusilə kənd təsərrüfatı, balıqçılıq və sahilyanı ekosistemlərin üstünlük təşkil etdiyi Neftçala rayonu iqlim dəyişikliklərinin təsirlərinə həssas ərazilərdən hesab olunur. Bu baxımdan risklərin vaxtında müəyyən edilməsi və onların idarə olunması üzrə praktik yanaşmaların formalaşdırılması xüsusi əhəmiyyət kəsb edir.
Layihə çərçivəsində görülən və planlaşdırılan işlər:
• Mövcud vəziyyətin təhlili: Neftçala rayonu üzrə iqlim risklərinin cari vəziyyəti ətraflı təhlil ediləcək;
• Analitik materiallar: Yaşıl maliyyə və ESG yanaşmaları üzrə geniş analitik materiallar hazırlanacaq;
• Maarifləndirmə tədbirləri: Aidiyyəti tərəflərin bilik və bacarıqlarının artırılması məqsədilə regional maarifləndirici tədbirlər keçiriləcək;
• Praktik metodik bələdçi: Layihənin əsas nəticələrindən biri kimi iqlim risklərinin qiymətləndirilməsi, yaşıl maliyyə alətləri, ESG yanaşmaları və yerli tətbiq modellərini əhatə edən praktik metodik bələdçi artıq ərsəyə gətirilib. Bu bələdçi dövlət qurumları, yerli özünüidarəetmə orqanları, maliyyə institutları, sahibkarlar və fermerlər üçün praktiki istifadə vəsaitidir;
• Analitik məqalələr: İqlim dəyişiklikləri və dayanıqlı inkişaf mövzularında geniş auditoriya üçün nəzərdə tutulmuş iki analitik məqalə hazırlanaraq ictimaiyyətə təqdim olunacaq.
ARPA İctimai Birliyinin İdarə Heyətinin sədri Günay Şahbazova layihənin əhəmiyyətini vurğulayaraq bildirib:
“Ölkəmizdə yaşıl iqtisadiyyata keçid dövlət siyasətinin prioritetidir. Neftçala kimi iqlim dəyişikliyinə həssas regionlarımızda risklərin düzgün idarə olunması və yaşıl maliyyə alətlərinin tətbiqi həm yerli sahibkarlığın dayanıqlığı, həm də ekoloji təhlükəsizlik baxımından strateji əhəmiyyət kəsb edir.”
Layihənin icrası nəticəsində Neftçala rayonunda iqlim risklərinin qiymətləndirilməsi sahəsində metodoloji yanaşmaların təkmilləşdirilməsi, yerli maraqlı tərəflərin məlumatlılığının artırılması və yaşıl maliyyə prinsiplərinin təşviqinə töhfə verilməsi nəzərdə tutulur. ARPA İctimai Birliyi dayanıqlı inkişaf məqsədlərinə uyğun olaraq iqlim risklərinin idarə olunması, yaşıl maliyyə və peşəkar biliklərin inkişafı istiqamətində fəaliyyətini bundan sonra da davam etdirəcəkdir.
Qeyd: Layihə çərçivəsində hazırlanmış praktik metodik bələdçinin elektron versiyası ilə bu link vasitəsilə tanış ola bilərsiniz: https://bit.ly/4x13m8L
