Prezident Kasım-Jomart Tokayev belaruslu həmkarı Aleksandr Lukaşenkonun Qazaxıstanın Rusiya və Belarusla ittifaqa girməsi təklifini “zarafat” adlandırıb.
“Mən onun zarafatını yüksək qiymətləndirdim” deyən Tokayev Qazaxıstana İttifaq dövlətinə üzvlük müqabilində nüvə silahı vəd edən Lukaşenkonun bəyanatlarını şərh edərkən deyib.
“Nüvə silahlarına gəlincə, onlara ehtiyacımız yoxdur, çünki biz Nüvə Silahlarının Yayılmaması Müqaviləsi və Nüvə Sınaqlarının Qadağası Müqaviləsinə qoşulmuşuq. Qazaxıstan bu müqavilələr üzrə öhdəliklərinə sadiq qalır”, – Tokayev əlavə edib.
O qeyd edib ki, Qazaxıstanın Rusiya və Belarusla ittifaqa girməsinə ehtiyac yoxdur: “Başqa inteqrasiya birlikləri var, ilk növbədə, Avrasiya İqtisadi İttifaqı. İqtisadi qarşılıqlı fəaliyyət, inteqrasiya, əməkdaşlıq məsələləri ilə məşğul olmaq lazımdır. Ticarət maneəsiz olmalıdır. Biz vahid əmtəə bazarı yaratmaq üçün hər cür səy göstərməliyik. Qazaxıstan yükdaşıyıcıları yüklərin həm Rusiya bazarına, həm də üçüncü ölkələrin bazarlarına sərbəst və sərfəli şəkildə daşınması üçün Rusiya ərazisində daxili dəmir yolu tariflərinə çıxış əldə etməlidirlər”.
Azpost.info
