Rusiyanın ABŞ-dakı səfiri Anatoli Antonov Pentaqonun sözçüsü Con Kirbinin Rusiya ilə bağlı açıqlamalarına cavab verib.
Azpost.info xəbər verir ki, o, bu sözləri təhqir və qəbuledilməz adlandırıb. “Con Kirbinin Rusiyaya qarşı bəyanatlarını təhqiredici və qəbuledilməz hesab edirik. Təəccüblüdür ki, bu cür təxribatçı tezislər sözün əhəmiyyətini yaxşı bilən keçmiş hərbçidən gəlir”, – səfir bildirib.
Diplomat xatırladıb ki, Rusiya rəsmiləri heç vaxt ABŞ hökuməti haqqında belə bəyanatlar səsləndirməyiblər: “Vaşinqtonda rəsmilərin öz mühakimələrini Ukrayna hakimiyyətinin yalanlarına əsaslandırmaq və Kiyev rejiminin cinayətlərinə diqqət yetirməmək normaya çevrilib”.
Antonov ABŞ-ın Ukraynanı silahlandırmağa davam etdiyinə də diqqət çəkib: “Belə bir hiss var ki, Vaşinqton atəşkəsdə maraqlı deyil. Con Kirbi və onun kimiləri üçün əsas odur ki, ABŞ hərbi-sənaye kompleksi öz anbarlarını köhnəlmiş silahlardan təmizləyərək əlavə gəlir əldə etsin”.
Pentaqonun sözçüsü Con Kibri aprelin 29-da keçirdiyi brifinqdə Rusiyanın Ukraynaya hərbi müdaxiləsi ilə bağlı sərt bəyanatlar verib. Kirbi Rusiyanın xüsusi əməliyyatının rusdilli əhalinin qorunması və nasizmin kökünün kəsilməsinə yönəldiyi barədə iddialarını da rədd edib.
Azpost.info
