Davosda keçirilən Dünya İqtisadi Forumunda çıxışı zamanı Almaniya kansleri Olaf Şolts Rusiyanın Ukraynadakı işğalçılıq müharibəsini uğursuzluq kimi qiymətləndirib.
Azpost.info xəbər verir ki, kansler Putinin NATO, Avropa İttifaqı və G7-nin birliyini və gücünü lazımınca qiymətləndirmədiyini deyib. Şoltsun fikrincə, Rusiyanın Ukraynaya müdaxiləsi əməkdaşlıq qaydalarına əsaslanan beynəlxalq nizamı pozur: “Buna görə də bizim məqsədimiz çox aydındır – Putin müharibədə qalib gəlməməlidir. Mən əminəm ki, o, qalib olmayacaq. Putin Ukraynanın müdafiəsini poza bilməyəcəyini başa düşsə, hərbi kampaniyanı dayandıracaq. Biz Ukraynanı dəstəkləyirik. Putin bilməlidir ki, diktə edilmiş sülh olmayacaq. Ukrayna bunu qəbul etməyəcək, biz də qəbul etməyəcəyik”. Almaniya kansleri Rusiyanı təcrid etmək üçün səyləri birləşdirməyə çağırıb: “Putin güclülərin diktə etdiyi dünya nizamına qayıtmaq istəyir. Burada heç kimi azadlıq, suverenlik və öz müqəddəratını təyin etmə hüququ yoxdur. Bu, imperializmdir”.
Azpost.info
