Rusiya prezidenti Vladimir Putin bütün maraqlı dövlətləri “Şimal-Cənub” nəqliyyat dəhlizinin yaradılması layihəsində iştiraka dəvət edib.
Azpost.info bildirir ki, Putin bu barədə Prezident İlham Əliyevlə birgə iştirak etdiyi Baykal-Amur magistral xəttinin tikilməsinin 50 illiyi ilə bağlı keçirilən tədbirdə deyib.
“BAM-ın miqyası və tarixi əhəmiyyəti bu gün Rusiya-Azərbaycan əməkdaşlığının başqa bir sahəsinə uyğundur. Söhbət Şimal-Cənub nəqliyyat dəhlizinin inkişafından gedir. Əslində, o, Şimal dəniz yolunu Fars körfəzi ilə birləşdirir… “Şimal-Cənub” nəqliyyat dəhlizi ən geniş beynəlxalq əməkdaşlığın nümunəsinə çevrilməlidir. Söhbət Avrasiya və qlobal Cənub ölkələrinin inkişafını, iqtisadi və sosial əlaqələrin sürətləndirilməsi məqsədilə yeni logistik marşrutların formalaşdırılmasından gedir. Bir daha vurğulamaq istərdim ki, biz bütün maraqlı dövlətləri bu layihədə iştiraka dəvət edirik”, – deyə Putin bildirib.
