Rusiya prezidentinin İstanbuldakı sammitə hansı səbəbdən qatılmadığı məlum olub.
Armiya.az-ın haberglobal-a istinadən bildirir ki, Kremldəki mənbələrə görə, Putin Ukraynada seçkilərə nail olmaq və daha sonra ölkənin yeni rəhbərliyi ilə danışıqlar prosesinə başlamaq istəyir. Kreml üçün sülhün yeganə şərti “şərtsiz təslim olmaqdır”.
Rusiya, Ukrayna və ABŞ nümayəndə heyətlərinin İstanbulda keçirilən üçtərəfli sammitindən sonra ABŞ prezidenti Donald Tramp Putinə zəng edərək prosesin gedişatını dəyərləndirib. Putin və Trampın Türkiyədə keçiriləcək sammitə qatılacağı gözlənilirdi, lakin Putinin iştirak etməyəcəyi təsdiqlənəndə Tramp yalnız bir nümayəndə heyəti göndərdi.
Rusiyada fəaliyyət göstərən müxalifətçi nəşri olan “Moskva Tayms” Kremldən aldığı son şok məlumatı paylaşıb.
Məlumata görə, Putin öz şərtlərində israr etməkdə davam edir, Zelenskini legitim lider kimi tanımır və Ukraynada seçkilərin keçirilməsini tələb edir. Putinin Trampı “Ukraynanın təslim olmasının zəruriliyinə” inandırmaq üçün diplomatik prosesi uzatdığı da iddia edilir.
Kremldəki mənbələrdən alınan məlumata görə, Putin öz şərtləri yerinə yetirilməyənə qədər heç bir sülh danışıqlarında iştirak etmək niyyətində deyil. O, Trampın təzyiqi ilə prosesi diplomatik yolla ləngidir.
Kremldən sızan məlumatlar arasında Putinin Ukraynada seçkilər keçirilənə və yeni lider seçilənə qədər Zelenski ilə deyil, yalnız Trampla görüşəcəyi də var.
Rusiyalı politoloq Aleksandr Qabuyevin fikrincə, Putinin əsl məqsədi Trampı sülhə inandırmaq deyil. Putin ya onu Rusiyanın şərtlərini qəbul etməyə məcbur etmək, ya da Ukraynanı günahkar kimi göstərmək, bununla da müharibəni ABŞ-ın prioritetləri siyahısından çıxarmaqdır.
Digər tərəfdən sızan məlumatlar arasında İstanbul sammitində iki adın gündəmə gəlməsi və bu adların gələcək danışıqlarda heyətlərdə ağırlıq daşıyacağı da var. Söhbət Ukrayna nümayəndə heyətinin tərkibində yer alan müdafiə naziri Rustem Umerov və Rusiya nümayəndə heyətinin tərkibində olan baş müzakirəçi Vladimir Medinskidən gedir. Rusiya nümayəndə heyətinin fikrincə, Umerov “praqmatikdir, təzyiqlərə tab gətirmir və nəticəyə diqqət yetirir”. Umerov həm də Ukrayna tərəfində ikitərəfli danışıqların əksəriyyətinin, o cümlədən Qara Dəniz Taxıl Dəhlizi Sazişinin memarı hesab olunur. Rusiyanın nümayəndəsi Medinski birbaşa Vladimir Putini təmsil edir. Medinski Aleksandr Duqinlə birlikdə Rusiyada neo-millətçi və Avrasiya diskursunun iki nəzəriyyəçisindən biri hesab olunur.
Digər tərəfdən, Kremlə yaxınlığı ilə tanınan EurAsia Daily Putinin İstanbul zirvəsindən ilhamlanaraq Ukraynanın “təslim olmaqdan əvvəl son fürsətini əldən verdiyini” söylədiyini iddia edib.
Həmçinin iddia edilir ki, Putin danışıqlardan sonra Kiyevin qalib gəlmək üçün artıq variantının qalmadığına hesab edir. Nəşr həmçinin bildirir ki, müharibəni son mərhələyə aparmağa hazırlaşan Putin əvvəllər istifadə olunmamış ağır silah sistemlərindən istifadə etməyə başlayacaq.
