“Putin təhlükəsizlik qüvvələrinin uğursuzluğundan şoka düşüb, istefalar olacaq”- “Bloomberg”

Rusiya prezidenti Vladimir Putin “Krokus Siti Holl”da baş verən terror aktına cavab olaraq yüksək səviyyəli təhlükəsizlik məmurlarını vəzifəsindən azad etməyə hazırlaşır.

Azpost.info xəbər verir ki, “Bloomberg” Rusiya hakimiyyətinə yaxın mənbələrə istinadən yazır ki, kadr dəyişikliyi Rusiya xüsusi xidmət orqanlarının rəhbərliyinə təsir göstərə bilər.

Mənbələrin fikrincə, bəzi məmurlar ABŞ-dan gözlənilən hücumla bağlı gələn xəbərdarlıqlara adekvat reaksiya verə bilmədiklərinə görə postlarını itirə bilərlər.

FTX rəhbəri Aleksandr Bortnikov, daxili işlər naziri Vladimir Kolokoltsev və Rusiya qvardiyasının direktoru Viktor Zolotov yəqin ki, Putinin “qara siyahısına” düşüblər. Kremlin yaydığı videodan görünür ki, bu şəxslər martın 25-də baş vermiş terror aktı ilə bağlı prezidentlə görüşdə iştirak ediblər. Lakin onların adları Kremlin saytında yayılan məlumatda iştirak edənlər siyahısına daxil edilməyib və çıxışları (əgər varsa) tədbirin 40 dəqiqəyə yaxın çəkilişindən kəsilib.

“Bloomberg”in mənbələrinə görə, Kreml trilyonlarla federal maliyyələşdirməyə və vətəndaşlara casusluq səlahiyyətlərinin görünməmiş şəkildə genişlənməsinə baxmayaraq, son iyirmi ilin ən qanlı terror aktının qarşısını ala bilməyən Rusiya təhlükəsizlik qüvvələrinin uğursuzluğundan şoka düşüb.

Mənbələr bildiriblər ki, əməkdaşları terror aktı zamanı insanlara köməyə gəlməyən Pavşino polis idarəsi birbaşa “Krokus”un binasında yerləşir. “Üstəlik, biz Daxili İşlər Nazirliyinin kiçik bir məntəqəsindən deyil, öz “pasportstol”una, silah otağına malik olan, tam heyətlə təchiz edilmiş və bütün ərazini patrul edən böyük bir idarədən danışırıq. Bu ayıbdır. Əgər bu polislər ölüm təhlükəsi ilə üzləşmiş insanların köməyinə gəlsəydi, təbii ki, onları xilas edərdilər. Amma polis əməkdaşları sadəcə qorxdular”, – mənbə deyib.

Rusiya Qvardiyasının xüsusi təyinatlı konsert salonuna terrorçuların hücumundan bir saat sonra gəlib. Üstəlik, silahsız insanlara hücum təxminən 20 dəqiqə davam edib, bundan sonra təcavüzkarlar maşına minərək oradan uzaqlaşıblar.

Rusiya prezidenti Vladimir Putin vətəndaşlara müraciətində təhlükəsizlik qüvvələrinin uğursuzluğunu etiraf etməkdən imtina edib.

Azpost.info

Əvvəlki məqalə

“Terror Putinin tədricən ölkəyə nəzarəti itirdiyini göstərir” –

Sonrakı məqalə

“Crocus”da terrorda ölənlərin sayı 140-a çatıb