“Qərbin sanksiyaları konkret olaraq Rusiya xalqına qarşı yönəlib, bu qərarlar ruslara nifrətə əsaslanır”.
Azpost.info xəbər verir ki, bunu Rusiya Təhlükəsizlik Şurasının sədr müavini Dmitri Medvedev bildirib.
“Bütün bunlar kimə qarşıdır? Bu sanksiyalar məhz Rusiya xalqına qarşı yönəlib. Təəssüf ki, belədir. Onlar hamımıza nifrət edirlər! Bu qərarlar Rusiyaya, ruslara, onun bütün sakinlərinə nifrətə əsaslanır. Amerikalı və avropalı nənə və babalar desələr də ki, biz sizin müdirlərinizi cəzalandırırıq, amma siz sadə vətəndaşları sevirik, bu, tamamilə cəfəngiyyatdır. Rusiya Mərkəzi Bankının və digər dövlət aktivlərinin ələ keçirilməsində məqsəd nədir? Rubla zərbə, inflyasiyanın artması və mağazalarda qiymətlərin qaldırılması – bütün bunlar sıravi rusiyalının həyat səviyyəsinin aşağı düşməsi deməkdir”, – Medvedev qeyd edib.
Onun fikrincə, eyni şey Rusiyadan neft və qazın alınmasına qoyulan embarqoya da aiddir: “Məqsəd büdcə gəlirlərini azaltmaq və dövləti sosial öhdəliklərdən, o cümlədən gəlirlərin indeksləşdirilməsindən imtina etməyə məcbur etmək, şəhər və kənd yerlərində vergi ödəyicisini vurmaqdır. Təyyarələrimizin uçuşlarına, səfərlərinə qadağa, ödəniş alətlərindən istifadəyə qadağa… Kimə qarşı? Yenə də sadə vətəndaşlara qarşı. Onları xoşagəlməz vəziyyətə salmaq üçün”.
Medvedev bu rusofobiyanın hətta rus mədəniyyətinə də sirayət etdiyini deyib: “Buna görə Tolstoy, Çexov, Çaykovski və Şostakoviç ləğv olundu. Dinimizə nifrət, Rus Pravoslav Kilsəsini məhv etmək və onun patriarxına qarşı sanksiyalar tətbiq etmək istəyi buradan irəli gəlir. Bu, demək olar ki, həmişə belə olub. Həm Aleksandr Nevskinin dövründə, həm 1812-ci il müharibəsi zamanı və SSRİ-nin çoxsaylı sanksiyalar altında yaşadığı 20-ci əsrdə. Bu nifrət iyrənc və irrasionaldır. Amma bu o demək deyil ki, biz buna dözməliyik. Sadəcə, gələcək üçün bütün lazımi nəticələr çıxarmalıyıq. Bizə qarşı bu münasibəti xatırlayın! Bizə nifrət edənləri isə bağışlamayın! Heç vaxt!”.
Azpost.info
