Böyük Britaniyanın Stok-on-Trent şəhərində yaşayan 57 yaşlı Kosta Fantis özündə qəribə bir simptom hiss etdikdən sonra həkimə müraciət edib. AzPost xəbər verir ki, Daily Mail nəşrinin məlumatına görə, kişi davamlı olaraq havada karameli xatırladan şirin bir qoxu hiss etdiyini bildirib.
Fiziki baxımdan sağlam olan Fantis, bu fərqli qoxunun səbəbini öyrənmək üçün tibbi müayinədən keçib. Lakin aparılan analizlər və biopsiya nəticəsində həkimlər ən ağır diaqnozlardan birini – IV mərhələli glioblastoma – beyin xərçənginin ən aqressiv formasını müəyyən ediblər.
Həkimlər bildiriblər ki, bu növ xərçəngin inkişafı nəticəsində xəstənin qoxu reseptorları zədələnib və beyin bu dəyişiklikləri fərqli qoxu kimi qəbul etməyə başlayıb. Məhz buna görə də Kosta Fantis daim karameli xatırladan qoxu hiss edib.
Ailəsi əvvəlcə bu simptomu ciddi qəbul etməyib. Fantisin ümumi vəziyyəti yaxşı olduğu üçün heç kim bunun ağır xəstəlik əlaməti ola biləcəyini düşünməyib. Maraqlıdır ki, bu qəribə qoxu onun hiss etdiyi yeganə simptom olub.
Hazırda Fantis Britaniyada radioterapiya və kimyaterapiya kursunu başa vurub. Ailəsi isə onun Almaniyada alternativ müalicəsi üçün vəsait toplamağa çalışır.
Brain Tumour Charity təşkilatının məlumatına görə, glioblastoma xəstələrinin orta ömür müddəti 12–18 ay təşkil edir. Bu diaqnozla 5 ildən çox yaşayanların faizi isə cəmi 5-dir.
