Ukrayna ordusu hava hücumundan müdafiə sistemlərinin çatışmazlığı ilə üz-üzə qalıb.
AzPost xəbər verir ki, “Financial Times” nəşri silah və sursat tədarükünün Avropa İttifaqı və ABŞ tərəfindən son aylarda xeyli ləngidiyini yazıb.
Mənbələrin məlumatına görə, tədarük həcmləri əvvəlkindən daha az olub və qeyri-müntəzəm şəkildə həyata keçirilib. Bu isə Ukrayna Silahlı Qüvvələrinin vəziyyətini ağırlaşdırıb. Qəzet qeyd edir ki, mövcud temp davam edərsə, yaxın aylarda sursat və hava hücumundan müdafiə vasitələrinin tükənməsi real təhlükəyə çevrilə bilər.
Avropa ölkələri əvvəlki öhdəliklərinə baxmayaraq, yeni istehsal imkanlarının məhdudluğu səbəbindən lazımi miqdarda texnika təqdim edə bilmir. Həmçinin, bir çox dövlətlər öz ehtiyatlarını bölüşməkdə tərəddüd edirlər.
Bu gün Londonda “Ramştayn formatı”nda keçiriləcək görüşdə məsələ əsas müzakirə mövzularından biri olacaq. İclasda NATO-nun baş katibi Mark Rütte də iştirak edəcək. Ukrayna Prezidenti Vladimir Zelenskinin tərəfdaşlardan əlavə dəstək istəməsi gözlənilir.
Ekspertlərin fikrincə, Qərbin hərbi yardımlarındakı fasilələr Kiyevin müdafiə qabiliyyətini zəiflədə və münaqişənin gedişinə təsir göstərə bilər.
