İsrail Ordusunun hava zərbələri Qəzza zolağında səhiyyə infrastrukturunu iflic vəziyyətə salıb. AzPost xəbər verir ki, Qəzzanın Səhiyyə Xidmətinin yaydığı məlumata görə, laboratoriyalar və qan götürmə mərkəzləri üçün istifadə edilən tibbi avadanlıqların təxminən altmış faizi məhv edilib.
Hazırda bölgədə yalnız qırx faizə qədər tibbi texnika salamat qalıb və məhdud imkanlarla fəaliyyət göstərir. Əsasən qan köçürmə mərkəzləri, donor qan bankları və diaqnostik laboratoriyalar bu dağıntılardan ciddi şəkildə zərər çəkib.
Tibbi personalın sözlərinə görə, bir çox həyati funksiyaları yerinə yetirmək mümkün deyil və nəticədə yaralıların müalicəsi, təcili analizlər və qan ehtiyatlarının idarə olunması sahəsində böhran yaranıb.
Mövcud şəraitdə nə donor qan ehtiyatlarını toplamaq, nə də laborator müayinələri vaxtında aparmaq mümkündür. Bu isə bölgədə ölüm hallarının artmasına və yoluxucu xəstəliklərin nəzarətsiz yayılmasına zəmin yaradır.
Səhiyyə qurumları beynəlxalq təşkilatlara çağırış edərək, təcili yardım və texniki dəstək tələb edirlər. Münaqişənin davam etdiyi bir zamanda səhiyyə sisteminin bu şəkildə çökməsi, Qəzzadakı minlərlə insanın həyatı üçün ciddi təhlükə yaradır.
