Qazaxıstanda Rusiya vətəndaşlarına, hətta ölkədə qeydiyyatları olsa belə, sanksiyalara görə avtomobil satışından imtina edilir.
Azpost.info bildirir ki, bu barədə “Mash Money” nəşri məlumat yayıb.
Nəşrin məlumatına görə, belə halla Rusiya vətəndaşı Almatı şəhərindəki “Skoda” diler mərkəzində qarşılaşıb. Avtosalonun əməkdaşları Rusiya pasportu ilə avtomobilin alqı-satqısını rəsmiləşdirməkdən imtina edərək Avropa İttifaqının sanksiyalarını və Çexiya istehsalçısının siyasətini əsas gətiriblər.
Ruslara avtomobil satışından imtina halları əvvəllər də qeydə alınıb. Lakin həmin hallar əsasən Qazaxıstanda yaşamayan Rusiya vətəndaşlarına aid olub.
“Autonews” və “Kazakhstan Today” nəşrlərinin məlumatına görə, Qazaxıstandakı “Hyundai”, “Kia”, “Toyota”, “Volkswagen”, “Chery”, “Audi”, “Nissan”, “Lexus” və “Lada” dilerlərində də avtomobil alışına məhdudiyyətlər qeydə alınıb.
“Volkswagen” bu məhdudiyyətləri siyasi vəziyyətlə əlaqələndirib. “Kia” salonlarında isə Rusiya vətəndaşının yaşayış icazəsi və ya fərdi identifikasiya nömrəsi (İİN) ilə vergi qeydiyyatını təsdiqləyən sənədi olduqda avtomobil ala bilməsi mümkün olub. “Audi” nümayəndəsi əcnəbi alıcılara imtinanı istehsalçının qərarı ilə izah edib.
“El.kz” nəşri yazıb ki, bəzi Qazaxıstan dilerləri sanksiyalara görə Rusiya vətəndaşları ilə müqavilə bağlamaqdan çəkindikləri üçün ruslar avtomobilləri vasitəçilər vasitəsilə almağa davam edirlər.
Yekaterinburqdan olan potensial alıcı İlya Mazayev “Avto Mail” nəşrinə bildirib ki, Qazaxıstanda avtomobil alarkən bəzi məsələləri qeyri-rəsmi yollarla həll etmək təklifləri ilə qarşılaşıb.
Milli Avtomobil İttifaqının vitse-prezidenti Anton Şaparin dilerlərin imtina etməsini təchizatın dayandırılması riskindən ehtiyat etmələri ilə izah edib. Onun sözlərinə görə, avtomobil istehsalçıları Qazaxıstan dilerlərinin Rusiyaya qarşı sanksiyalardan yayınmağa kömək etdiklərindən şübhələnə və onlarla əməkdaşlığı dayandıra bilərlər.
